نواز شریف کو جیل میں انڈا، پراٹھا اور چائے کی پیشکش

164

راولپنڈی: ایون فیلڈ ریفرنس میں سزا یافتہ پاکستان کے سابق وزیر اعظم نواز شریف کو اڈیالہ جیل میں انڈا، پراٹھا اور چائے کی پیشکش کی گئی تاہم انہوں نے صرف چائے پی۔

نجی ٹی وی کے مطابق احتساب عدالت سے ایون فیلڈ ریفرنس میں سزاپانے والے مسلم لیگ(ن)کے قائد میاں نواز شریف اور ان کی صاحبزادی مریم نواز کو گزشتہ روز اڈیالہ جیل منتقل کردیا گیا۔

نواز شریف کو اڈیالہ جیل کے ہائی سکیورٹی زون میں رکھا گیا جہاں دونوں نے پہلی رات قید میں کاٹی۔

مریم نواز نے اڈیالہ جیل کی خواتین بیرکس میں رات گزاری، نواز شریف اور مریم نواز نے صبح فجر کی نماز ادا کی، بعد ازاں دونوں کو ناشتہ پیش کیا گیا۔

جیل مینوئل کے مطابق میاں نواز شریف کو انڈا، پراٹھا اورچائے کی پیشکش کی گی تھی تاہم نوازشریف نے صرف اڈیالہ جیل کی چائے صبح ناشتے میں پی اور چائے کے ساتھ کچھ ادویات بھی استعمال کیں جب کہ مریم نواز نے بھی جی بھر کر ناشتہ نہیں کیا۔

واضح رہے کہ ایون فیلڈ ریفرنس میں سزایافتہ میاں نواز شریف اوران کی صاحبزادی مریم نواز کو گرفتاری کے بعد خصوصی چارٹرڈ طیارے کے ذریعے اسلام آباد لے جایا گیا جہاں انہیں طبی معائنے کے بعد اڈیالہ جیل منتقل کردیا گیا۔

نوازشریف اورمریم نواز کے خلاف العزیزیہ اور ہل میٹل ریفرنسز کی سماعت احتساب عدالت میں جاری ہیں لیکن نوازشریف کے جیل جانے کے بعد اب مقدمات کی بقیہ سماعتیں اڈیالہ جیل میں ہی ہوں گی۔

Print Friendly, PDF & Email
حصہ