قدرت کے رنگ

میں نے اپنے بچپن میں ایک ڈراؤنی مووی دیکھی تھی جس کا نام تھا " بیس سال بعد"۔ کل سے ایک خبر دل کو چیر رہی ہے کہ ڈاکٹر عافیہ صدیقی کی اپنی بہن فوزیہ صدیقی سے بیس سال بعد جیل میں ملاقات ہوئی ہے۔ فلم تو فلم ہوتی ہے اس میں ہر چیز کی شوٹنگ کی جاتی ہے مگر پھر بھی ہم اس کے کسی جذباتی سین میں اپنے آنسوؤں پر قابو نہیں رکھ پاتے ذرا سوچئے ! کہ کل اس بہن کی کیا کیفیت ہوئی ہوگی جو بیس سال سے کسی اپنے کی شکل دیکھنے کی منتظر تھی اور ملاقات کے وقت نہ اسے بہن کے گلے لگنے کی اجازت ملی اور نہ ہی اپنے اہل خانہ کی تصاویر دیکھنے کی رعایت۔ ایک موٹے شیشے کی دیوار کے پار ان دونوں بہنوں کی کی کیفیت کیا ہوگی یہ ہم مشتاق صاحب کی اس بات سے اندازہ لگا سکتے ہیں جو ملاقات کے بعد انہوں نے بتائی وہ کہتے ہیں میں کل سے ٹراما میں ہوں اس کیفیت سے باہر آؤں تو قوم کو جگاؤں گا۔ کاش ! کہ یہ قوم جاگ رہی ہوتی تو آج عافیہ صدیقی جیل کی صعوبتیں کاٹ ہی کیوں رہی ہوتی، اس قوم کے ضمیرکو تو پتا نہیں کون سا نشہ دے کر سلا دیاگیا ہےجو جاگنے کا نام ہی نہیں لیتا۔ ارض پاک کے دو ٹکڑے ہوئے ہم سوتے رہے، ملک کے دو وزائے اعظم کو جلسہ گاہ میں قتل کر دیا گیا ہم سوتے رہے، سانحہ کارساز ہوا ہم سوتے رہے، بلدیہ کی فیکٹری میں زندہ ورکر جل کر خاک ہوئے ہم سوتے رہے، عمران خان کی ریلی کی کوریج کرتے ہوئے لیڈی رپورٹر فرائض کی انجام دہی کے دوران مبینہ حادثے میں اپنی جان گنوا بیٹھی ہم سوتے رہے۔ 12 مئی کو شہر کراچی میں قتل عام ہوا ہم سوتے رہے اور ابھی موجودہ مئی کے مہینے میں ہی ملک میں جو جو ہنگامہ خیزیاں مچیں اس سے کون واقف نہیں مگر ہم اب بھی سو ہی رہے ہیں۔ آخر یہ کون سی خواب غفلت کی کیفیت ہے جس سے ہم جاگنے کی کوشش تک نہیں کرتے ؟ ڈاکٹر عافیہ نے ملاقات کے پہلے گھنٹے میں اپنے اوپر کی جانے والی بہیمانہ تشدد کی داستان سنائی کیا گز رہی ہوگی قوم کی اس بیٹی پر سوئی ہوئی قوم کیسے سمجھے گی؟ اللہ سے دعا ہے کہ اس قوم کی بیٹی کی آزمائش ختم ہوجائے اور وہ اپنی زندگی میں اپنے وطن واپس آکر اپنے بچوں اور اپنے اہل خانہ سے مل سکے۔ خدارا اس وقت میں ایک آواز ہو کر اپنی اس بہن کی رہائی کے لئے آواز اٹھائیں یہ آزمائش ڈاکٹر عافیہ کی نہیں ہم سب کی ہے اور ہمیں اس آزمائش میں پورا اتر کر اپنے اللہ کی بارگاہ میں سرخرو ہونا ہے۔

محدود آبی وسائل کے ساتھ، پانی کا تحفظ چین کے ایجنڈے میں ہمیشہ سرفہرست رہا ہے اور اس حوالے سے کئی محاذوں پر کوششیں کی گئی ہیں، جن میں زراعت، صنعت، شہری علاقوں اور دیگر اہم شعبوں میں پانی کے تحفظ کے ساتھ ساتھ سائنسی تکنیکی اختراعات شامل ہیں۔ چین کی جانب سے پانی کے مزید معقول استعمال اور اس قیمتی نعمت کے زیاں کو روکنے کے ساتھ ساتھ، گزشتہ دہائی میں ماحولیاتی تحفظ کے ذریعے پانی کے معیار کو بہتر بنانے کے لیے بھی نمایاں کوششیں کی گئی ہیں۔ ملک نے عالمی سطح پر میٹھے پانی کے مجموعی وسائل کے صرف 6 فیصد میں سے دنیا کی تقریباً 20 فیصد آبادی کی ضروریات کو احسن طور پر پورا کیا ہے۔ حالیہ برسوں میں بارہ لاکھ سے زائد افراد کو دریاؤں اور جھیلوں کے سربراہوں کے طور پر مقرر کیا گیا ہے، تاکہ ملک میں پانی کے ذخائر کے ماحولیاتی تحفظ سے فائدہ اٹھایا جا سکے اور مقامی حالات کے مطابق آبی آلودگی سے نمٹنے اور آبی ماحولیات کو بہتر بنانے کے لیے درست اقدامات کیے جا سکیں۔ علاوہ ازیں، چین نے کچھ علاقوں میں مٹی کے کٹاؤ اور زمینی پانی کے بے تحاشہ استعمال جیسے مسائل کو حل کرنے میں بھی کامیابیاں حاصل کی ہیں، جس سے زیادہ سے زیادہ آبی زخائر کو بحال کیا گیا ہے۔ انہی کوششوں کو مزید آگے بڑھاتے ہوئے چین کی جانب سے حالیہ دنوں یہ اعلان کیا گیا ہے کہ وہ پانی کے قومی نیٹ ورک کی تعمیر میں سرمایہ کاری میں مزید اضافہ کرے گا۔اس حوالے سے مرکزی بجٹ میں پانی کے نیٹ ورک کی تعمیر کے منصوبوں کو مضبوط بنانے پر توجہ مرکوز کی جائے گی جو مختلف علاقوں میں پھیلے ہوئے ہیں۔ اس کا ایک مقصد سیلاب کی روک تھام اور اناج کی پیداوار کے حوالے سے ملک کی صلاحیتوں کو بہتر بنانا بھی ہے۔اس ضمن میں مقامی حکومتوں کی بھی حوصلہ افزائی کی جائے گی کہ وہ تعمیری منصوبوں میں سرمایہ کاری کو ترجیح دیں اور متعلقہ منصوبوں کے ٹھوس نفاذ کو یقینی بنانے کے لیے تمام وسائل بروئے کار لائیں۔ چینی حکام نے یہ بھی واضح کر دیا ہے کہ مارکیٹ پر مبنی اور قانون پر مبنی اصول کی پیروی کرتے ہوئے، ہر قسم کے سرمایہ کاروں بالخصوص نجی شعبے کی حوصلہ افزائی کی جائے گی کہ وہ تعمیراتی منصوبوں میں بڑھ چڑھ کر شریک ہوں۔چین نے اس حوالے سے ابھی حال ہی میں 2021تا2035 کی مدت کے دوران پانی کے قومی نیٹ ورک کی تعمیر کے لئے ایک رہنما اصول جاری کیا ہے، جس پر عمل درآمد کے دوران آبی سلامتی کے تحفظ کی صلاحیت کو بڑھانے کی کوششیں کی جارہی ہیں۔گائیڈ لائن میں متعدد طویل مدتی اہداف مقرر کیے گئے ہیں، جن میں پانی کے قومی نیٹ ورک کی عملی تشکیل، صوبائی، میونسپل اور کاؤنٹی کی سطح پر پانی کے نیٹ ورک بنانا، اور قومی آبی تحفظ کے نظام کو فروغ دینا شامل ہے جو سوشلسٹ جدیدکاری کے تقاضوں کو پورا کرتا ہے۔ وسیع تناظر میں گزشتہ ایک دہائی میں چین میں آبی وسائل کی بقا اور تحفظ...

اٹھائیس مئی یوم تکبیر وہ تاریخ ساز دن ہے جب اللہ تعالیٰ کے خصوصی فضل و کرم سے پاکستان کی سول و عسکری قیادت نے اپنے ملک و قوم کے وسیع تر مفاد میں، اقوام عالم کے تمام تر تحفظات کو بالائے طاق رکھتے ہوئے پاکستان کو عالم اسلام کی پہلی ایٹمی قوت بنا کر ثا بت کر دکھایا کہ پاکستان نہ تو وہ کسی سے کم ہے اور نہ ہی کسی میدان میں پیچھے۔ حالانکہ اس وقت کے امریکی صدربل کلنٹن نے پاکستان کے حکمرانوں کو ٹیلی فون کرکےاقتصادی دھمکیوں سے ڈرایا تو کہیں پانچ ارب ڈالر کے امدادی پیکج کالالچ دیا۔ یہ وہ ایام تھے جب 11 اور 13 مئی کو بھارت راجستھان میں پوکھران کے مقام پر ایٹمی دھماکے کر کے پاکستان میں خطرے کی گھنٹی بجا چکا تھا، بھارت نے یکے بعد دیگرے 5 دھماکے کر کے اس خطے میں طاقت کے توازن کو بگاڑنے کی مذموم سازش کی تھی جسکا ہر صورت جواب دینا لازمی تھا۔ اس واقعہ کے بعد ملک کے سب ہی حلقوں میں یکساں تشویش پائی جاتی تھی، اس وقت اہل پاکستان پر صرف ایک جنون طاری تھاکہ بھارت کے ایٹمی دھماکوں کا جواب دینا ضروری ہے۔ ایٹمی دھماکے کرکے پاکستان کو ڈرانے کی ناکام کوشش کرنے والوں کو بتانا ہے کہ ہم ان کے شرلی جیسے ہتھیاروں سے ڈرنے والے نہیں ہم جوش و جذبات میں بھی ان سے زیادہ ہیں اور قوت و طاقت میں بھی کسی سے کم نہیں۔ ہم ایک امن پسند قوم ہیں مگر جارحیت برداشت ہر گز نہیں کریں گے، ہم اینٹ کا جواب پتھر سے دینا جانتے ہیں۔ آخر کار 28مئی 1998ء کی سہ پہر تین بج کر 16 منٹ پر امریکہ، برطانیہ، جرمنی، فرانس اور آسٹریلیا کی رسد گاہوں میں الارم کا شور بلند ہوا۔ سیسمو گرافک آلات یکدم حرکت میں آئے، کوئی رسد گاہ اس کو 40 کلو ٹن کا دھماکہ دکھا رہی تھی تو کوئی 25 سے 30 کلو ٹن، کوئی بھی وثوق سے نہیں کہہ سکتا تھا کہ یہ سب کچھ زیر زمین کہاں پر ہوا ہے۔ عالمی میڈیا پر ایک شور برپا ہوا اور پاکستان نے وہ کر دکھایا جس کی برسوں پہلے سے توقع کی جا رہی تھی اور یوں ایٹمی دھماکے کرکے پاکستان دنیا کا ساتواں ایٹمی ملک بن گیا اور اسے یہ اعزاز بھی حاصل ہوا کہ یہ پہلا اسلامی ملک تھا جس نے ایٹمی شعبے میں یہ کمال حاصل کیا تھا۔ پاکستان کے ایٹمی سائنسدان اور حکمرانوں نے وطن عزیزکو ناقابل تسخیر بنانے کا یہ دلیرانہ قدم اٹھا کر مسلم امہ کو بھی روشن راہ دکھائی کہ وہ بھی اس تاریخ ساز قدم کو دیکھ کر دنیا میں فخر سے جینا سیکھیں۔ پاکستان کے ایٹمی پروگرام کی تاریخ ایسے واقعات سے بھری پڑی ہے جب اس کے خاتمے کے لیے پوری دنیا کی طاقتیں برسر پیکار تھیں مگر اس کے باوجود اللہ تعالیٰ کی نظر کرم نے اس کی تکمیل میں نمایاں کردار ادا کیا۔ ایٹمی تجربے سے قبل سیاست دانوں اور عوام کی فکر مندی تو اپنی جگہ پر مگر افواج پاکستان جس کے ہاتھوں میں ملک کی...

کیا پاکستان نے اپنی فارن پالیسی کی سمت تبدیل کرتے ہوئے ایک واضح سمت کا انتخاب کرلیا ہے؟- پاکستانی دفتر خارجہ نے ان خبروں کی تردید کی ہے کہ پاکستان نے دوٹوک انداز میں چین کے کیمپ میں جانے کا فیصلہ کرلیا ہے اور مزید یہ کہا ہے کہ پاکستان کیمپوں کی سیاست سے دور رہ کر ایک متوازن فارن پالیسی پر عملدرآمد کرتا رہا ہے اور کرتا رہے گا. اس ضمن میں دفترِ خارجہ نے اپنے بیان میں بالخصوص چین اور امریکہ سے اپنے دیرینہ اور اہم تعلقات کا ذکر کیا اور مستقبل میں ان تعلقات کو اسی طرح مستحکم رکھنے کی خواہش کا اظہار بھی کیا۔ سفارتی سطح پر ہم دفترِ خارجہ سے ایسے ہی جواب کی توقع کر سکتے ہیں. تاہم کیا قرائن اس سے مختلف کسی ممکنہ پیش رفت کی طرف اشارہ کرتے ہیں؟ اس سوال کا جواب تلاش کرنے کے لیے ہم پچھلے ایک سال کے حالات پر نظر ڈالتے ہیں. جو خبریں پاکستان کے حوالے سے لگ بھگ پچھلے ایک سال سے گردش کرتی رہی ہیں ان میں پاکستان کے آئی ایم ایف کے ساتھ غیر نتیجہ خیز مذاکرات اور ان کے بے نتیجہ ہونے کے باوجود آئی ایم ایف کی عائد کردہ شرائط کو، قبول کرنے کی بناء پر پاکستانی عوام کی معاشی حالتِ زار اور زبوں حالی سے متعلق خبریں سرِ فہرست ہیں، آئی ایم ایف اور ورلڈ بینک ایسے بین الاقوامی مالیاتی ادارے ہیں جو مغربی معیشتوں اور بالخصوص امریکہ کے زیر اثر ہیں۔ ماضی میں ہم دیکھ چکے ہیں کہ ان اداروں سے قرضے اور مراعات حاصل کرنے میں پاکستان کو اس بناء پر آسانی میسر تھی کہ پاکستان کو ان مغربی ممالک اور امریکہ کی پشت پناہی بوجوہ حاصل رہی. ان میں سب سے بڑی وجہ افغانستان کے حالات رہے اور دوسری غالباً پاکستان کی جغرافیائی اور عسکری اہمیت رہی ہوگی. افغانستان سے مغرب کا فوجی انخلاء تو ہو چکا، لیکن وہاں کی صورتحال اور وقوع پزیر ہونے والی تبدیلیوں کی نوعیت تو غیر اہم نہیں ہوئی. مزید یہ کہ عسکری اہمیت کے اعتبار سے تو شاید یوکرین جنگ کے تناظر میں پاکستان معاملے کے دونوں فریقین کے لیے اور زیادہ اہم ہوجاتا ہے۔ اس صورتحال میں پاکستان کی اہمیت کا کم ہونا تو بعید از گمان ہے، تاہم مغرب سے کھچاؤ کی بڑی وجوہات میں چین سے پاکستان کی قربت اور سی پیک جیسے منصوبوں پر پیش رفت شامل ہو سکتے ہیں. روس یا ایران سے بہتر ہوتے ہوئے تعلقات تجارتی سرگرمیوں تک محدود ہیں جو مغرب کے لیے شاید اتنے پریشان کن نہ ہوں. ایسا محسوس ہوتا ہے کہ مغرب اور بالخصوص امریکہ کی جانب سے پاکستان پر دباؤ بڑھانے کے دو مقاصد ہو سکتے ہیں، اوّل یہ کہ ایک کمزور پاکستان بھارت سے اپنے تعلقات بہتر بنانے کے لیے زیادہ آسانی سے رضامند ہوگا، جو بھارت کو چین کے بالمقابل کھڑا کرنے میں معاون ہوگا۔ مزید یہ کہ اقتصادی طور پر کمزور پاکستان کو اپنے دیگر دوستوں سے جن میں چین بھی شامل ہے خاطرخواہ مدد نہ ملنے کی صورت میں امریکہ کی جانب دیکھنا اور اپنی پالیسیوں کو...

اللہ کے پیغام کا مسکن ہے وطن ہم جس میں ہیں محفوظ وہ دامن ہے وطن گہوارۂ اسلام ہے ملک قائد ہے روح اگر قوم تو پھر تن ہے وطن یہ جان لینا ضروری ہے کہ ہم نے ایٹمی قوت بننے کی ضرورت کیوں محسوس کی ؟ بھارت جو ہمارا ازلی دشمن ہے اس نے ارض پاک کے وجود کو دل سے تسلیم نہیں کیا۔ وہ اسے نقصان پہنچانے کے لئے موقع کی تلاش میں رہتا ہے۔ اُس کا ایٹمی انرجی کمیشن تو 1946 میں قائم ہو گیا تھا جبکہ پاکستان نے 1971 کے بعد ایٹمی صلاحیت حاصل کرنے کا ارادہ کیا، جب بھارت نے تمام بین الا قوامی قوانین کو بالائے طاق رکھتے ہوئے اپنی افواج مشرقی پاکستان میں داخل کر دیں اور پاکستان کو دو لخت کرنے میں کامیاب ہو گیا۔ اس وقت پاکستان کو احساس ہوا کہ دنیا میں اب جسکی لاٹھی اُسکی بھینس والا قانون ہی چلے گا۔ 18مئی 1974 کو بھارت نے پاکستان کی سرحد سے محض 93 میل دور راجستھان میں پہلا تجربہ کیا تو ایسے حالات میں مکار و عیار دشمن سے محفوظ رہنے کی خاطر پاکستان نے بھی ایٹم بم کے حصول کے لئے دن رات ایک کر دیا۔ اُس وقت کے وز یر اعظم ذو الفقار علی بھٹو نے جناب منیر احمد خاں کو یہ فریضہ سونپا۔ بعد میں ڈاکٹر عبد القدیر خان کی سربراہی میں کہوٹہ لیبارٹریز کا قیام عمل میں آیا۔ ذوالفقار علی بھٹو کے بعد اقتدار جنرل ضیا الحق کے ہاتھوں میں آیا لیکن ایٹمی پروگرام سرعت کے ساتھ جاری رہا۔ جبکہ 10 دسمبر 1984 کو ڈاکٹر عبدالقدیر خان نے جنرل ضیا الحق کو لکھا کہ ہم بفضل خدا اس قابل ہوگئے ہیں کہ ایک ہفتے کے نوٹس پر ایٹمی دھما کے کر سکیں۔ لیکن پاکستان نے ایک پرامن ملک ہونے کے ناطے قوت حاصل کر لینے کے باوجو د اس کا اظہار نہیں کیا جبکہ بھارت نے 11مئی1998 کو پوکھران کے مقام پر تین ایٹمی دھماکے کئے۔ پھر دو روز بعد 13 مئی کو مزید دو دھماکے کر دیے۔ توسیع پسندی اور علاقائی بالا دستی پر یقین رکھنے والی بھارتی سرکار کا یہ اقدام خطرے سے خالی نہ تھا۔ دنیا کی چھٹی ایٹمی قوت بننے کے ساتھ ہی بھارتی حکمرانوں کا لب ولہجہ رعونت و تکبر کا مظہر ہو گیا۔ پاکستان کو لائن آف کنٹرول پر بڑے پیمانے پر کاروائی کی دھمکیاں دی جانے لگیں۔ کشمیر کاز کو یکسر بھلا دینے کے مشورے دئیے جانے لگے۔ جبکہ آزاد کشمیر پر بھی قبضہ کرنے کے ارادوں کا اظہار کیا جانے لگا۔ اب یہ ضروری ہو گیا تھا کہ جوابی کاروائی کی جائے اور بتا دیا جائے کہ پاکستان بفضل خدا ایٹمی قوت ہے اور اپنے دفاع کی صلاحیت رکھتا ہے۔ طاقت کے نشے میں سرشار ہو کر ہمیں کمزور سمجھنے کی غلطی کرتے ہوئے ہمارے خلاف جارحیت کا ارادہ بھی نہ کیا جائے۔ پاکستان میں اُس وقت میاں نواز شریف کی حکومت تھی۔ اب مغربی ممالک کا ضمیر بھی جاگ اٹھا جو بھارت کے ایٹمی دھماکوں کے موقع پر سویا ہوا تھا۔ پاکستان کو سمجھایا، بجھایا، لبھایا اور ڈرایا گیا۔ تمام قرضے یک...