فیس بک نے دعویٰ کیا ہے کہ اس نے طالبان کے افغانستان پر کنٹرول حاصل کرنے کے بعد شہریوں کے انخلاء میں مدد کی ہے۔
فیس بُک کے ایک ترجمان نے بی بی سی کو بتایا ہے کہ کمپنی نے 175 شہریوں کو افغانستان چھوڑنے میں مدد کی ہے۔ کمپنی نے یہ بھی بتایا کہ انخلاء کرنے والوں میں 75 بچے، سماجی کارکنان اور صحافی بھی تھے۔
ترجمان کا یہ بھی کہنا تھا کہ فیس بک کے ملازمین اور قریبی شراکت داروں کو افغانستان سے نکالنے کیلئے ہم نے صحافیوں اور اُن کی فیملی کو بھی وہاں سے نکالا جو شدید خطرے میں تھے۔
واضح رہے کہ فیس بُک طالبان کو دہشت گرد گروہ کے طور پر دیکھتا ہے۔ کمپنی نے اس ماہ کے شروع میں ہی اس بات کی بھی تصدیق کی تھی کہ وہ اپنی ویب سائٹ پر طالبان کے مواد پر پابندی جاری رکھے گی کیونکہ وہ اس گروپ کو ایک دہشت گرد تنظیم سمجھتی ہے۔
