ایاز صادق کی عمران خان کیخلاف عائشہ گلالئی کی مدد کا انکشاف

153

اسلام آباد (آن لائن) قومی اسمبلی سیکرٹریٹ کی تحریک انصاف کی منحرف رکن عائشہ گلالئی کو عمران خان کے خلاف تمام قانونی امداد اور رہنمائی فراہم کیے جانے کا انکشاف ہوا ہے ۔ ذرائع نے آن لائن کو بتایا کہ اسپیکر قومی اسمبلی سردار ایاز صادق کے سیکرٹری سعید میتلا کی طرف سے اس حوالے سے اسمبلی سیکرٹریٹ کے شعبہ قانون سازی کو ہدایات جاری کی گئی کہ وہ الیکشن کمیشن میں عمران خان کی جانب سے عائشہ گلالئی کے خلاف نا اہلی کی درخواست میں انہیں مکمل قانونی معاونت فراہم کریں ،اس کے لیے باقاعدہ جوائنٹ سیکرٹری لطیف قریشی کی ذمے داری لگائی گئی جو الیکش کمیشن میں نا اہلی کیس کی ہر سماعت سے قبل عائشہ گلالئی اور ان کے وکیل کو مکمل معاونت اور قانونی امداد فراہم کرتے اور اس کے لیے سرکاری وسائل بھی استعمال ہوتے رہے حتیٰ کہ الیکشن کمیشن میں جمع کرائے گئے تحریری جواب کی تیاری میں بھی تمام رہنمائی اسمبلی سیکرٹریٹ نے فراہم کی۔ذرائع نے بتایا کہ چونکہ عمران خان براہ راست اسپیکر قومی اسمبلی ایاز صادق کے حریف ہیں اس لیے ان کی ہدایت پر عائشہ گلالئی کی مکمل مدد کی گئی اور اس طرح وہ نا اہلی سے بچ گئی جبکہ اسپیکر قومی اسمبلی کے پاس جو تحریک انصاف کی جانب سے نا اہلی کا ریفرنس جمع کرایا گیا تھا اس کو بھی یکسر نظر انداز کر دیا گیاہے حالانکہ قانون اس حوالے سے واضح ہے کہ جو بھی رکن پارٹی سربراہ کے فیصلے سے انحراف کرے اس کے خلاف کارروائی ہو سکتی ہے۔ذرائع نے مزید بتایا کہ تحریک انصاف کے جو 5 منحرف اراکین قومی اسمبلی ہیں ا سپیکر آفس نے ان پر بھی دست شفقت رکھا ہوا ہے ۔ اس حوالے سے جب اسمبلی کے ترجمان سے رابطہ کیا گیا تو انہوں نے اس پر کسی بھی قسم کے تبصرے سے گریز کیا اور کہا کہ اس حوالے سے ان کے پاس کوئی معلومات نہیں ہیں ۔