اسلام آباد: وفاقی وزیراطلاعات ونشریات سینیٹر شبلی فراز کا کہنا ہے کہ وزیراعظم عمران خان نے شوگر مافیہ کے خلاف کارروائی کا وعدہ کیا تھا جو جلد پورا ہوگا۔
وزیر اطلاعات شبلی فراز نے اپنے ٹوئٹر پیغام میں کہا کہ شوگر مافیہ کے خلاف کارروائی ہوگی اور وزیراعظم کا یہ وعدہ جلد پورا ہوگا، آج بنی گالا میں اسی حوالے سے اہم اجلاس ہے، اجلاس کے بعد پریس کانفرنس بھی ہوگی۔
Pm Imran khan promise,to go after those who patronised & benefited sugar mafia by fleecing public at large, soon to be fulfilled . A very important meeting to be held today in Banigala followed by a press conference.
— Senator Shibli Faraz (@shiblifaraz) June 7, 2020
خیال رہے کہ وفاقی حکومت نے شوگر رپورٹ میں نام آنے والوں کے خلاف کارروائی کرنے کے فیصلے کے حوالے سے آج اعلیٰ سطح اجلاس بلالیاہے۔
ذرائع کے مطابق حکومت نے شوگر رپورٹ میں نام آنے والوں کے خلاف کارروائی کرنے کا فیصلہ کیاتھا اس حوالے سے آج بروز اتوار اعلیٰ سطح اجلاس بلایاگیاہے جس میں اس حوالے سے فیصلہ کیاجائے گا۔
یہ بھی واضح رہے کہ شوگر اسکینڈل کے ایک اہم کردار اور تحریک انصاف کے مرکزی رہنما جہانگیر خان ترین جمعہ کو اچانک لندن چلے گئے ہیں اور لندن روانگی سے قبل انہوں نے جڑواں شہروں میں اہم ملاقاتیں بھی کی ہیں اور ساتھ ہی واضح بھی کردیا ہے کہ وہ وطن واپس جلد آئیں گے۔
ذرائع مزید بتایا ہے کہ حکومت کے بعض حلقے ان کے بیرون ملک جانے کے حق میں نہیں تھے مگر ترین چونکہ ٹکٹ بھی بک کروا چکے تھے اس لیے ان ملاقاتوں کے بعد جانے میں کامیاب ہوگئے۔
یہ بھی پتا چلا ہے کہ شوگر اسکینڈل کی فرانزک آڈٹ رپورٹ سامنے آنے کے بعد ذمے داروں کے خلاف ابھی نیب یا ایف آئی اے نے کوئی کاروائی شروع نہیں کی اور اس حوالے سے وہ حکومتی احکامات کے منتظر ہیں دوسری طرف وزیراعظم عمران خان سے گزشتہ دنوں ہونے والی اہم ملاقاتوں میں چیئرمین سینیٹ صادق سنجرانی،اسپیکر قومی اسمبلی اسد قیصر اور وزیر دفاع پرویز خٹک نے انہیں قائل کرنے کی کوشش کی ہے کہ وہ جہانگیر ترین کے خلاف مزید کارروائی سے گریز کریں ۔