نشے میں دھت مسافر کی ہنگامہ آرائی پر غیرملکی پرواز کی کراچی میں لینڈنگ

222

کراچی: دوران پرواز نشے میں دھت مسافر کی جانب سے ہنگامہ آرائی کرنے پر غیر ملکی ائرلائن کے طیارے نے کراچی میں لینڈنگ کی۔

نجی خبر رساں ادارے کے مطابق ترکیہ کے شہر استنبول سے تھائی لینڈجانے والی ترکش ائر لائن کی پرواز ٹی کے 172 میں نشے میں دھت مسافر نے ہنگامہ آرائی کی، جس پر مسافروں نے پرواز کے عملے سے شکایت کی۔

دوران پرواز مسافروں کی شکایت پر کپتان نے کراچی ائرپورٹ کے کنٹرول ٹاور سے رابطہ کرکے لینڈنگ کی اجازت طلب کی اور طیارے کو جناح انٹرنیشنل ائرپورٹ پر اتار لیا۔

کپتان کی شکایت پر سیکورٹی ادارے نے نشے میں دھت مسافر کو پرواز میں غل غپاڑہ کرنے پر حراست میں لے کر پرواز سے آف لوڈ کردیا۔ مسافر کو سیکورٹی فورس کے حوالے کردیا گیا ہے۔ ذرائع کے مطابق مسافر کا طبی معائنہ بھی کیا جا رہا ہے۔ کارروائی مکمل کیے جانے کے بعد مسافر کو ڈی پورٹ کردیا جائے گا۔

ترجمان سول ایوی ایشن کی جانب سے جاری وضاحتی بیان میں کہا گیا ہے کہ ترکیہ کا مسافر طیارہ کراچی ائرپورٹ اترا مگر یہ ہنگامی لینڈنگ نہیں تھی۔ پائلٹ نے نشے میں دھت مسافر  کے غل غپاڑہ کرنے پر 9 بج کر 40 منٹ پر کراچی لینڈنگ کروائی اور مسافر کو آف لوڈ کرنے کے بعد طیارہ اپنی منزل تھائی لینڈ کی جانب روانہ ہوگیا۔

حراست میں لیے گئے مسافر کو سیکورٹی نے ٹرانزٹ لاؤنج منتقل کردیا، جہاں سے اُسے آج رات ترکیہ فلائٹ سے ڈی پورٹ کردیا جائے گا۔