افغانستان کے مقامی تاجروں کے تعاون سے مغربی صوبے ہرات کے ایک صنعتی پارک میں دو کارخانے قائم کیے گئے ہیں۔ غیر ملکی خبر رساں ادارے نے صوبے کے چیمبر آف انڈسٹریز اینڈ مائنز کے چیئرمین کے حوالے سے بتایا کہ کپاس کی پروسیسنگ اور آکسیجن پیدا کرنے والی دو فیکٹریاں ہرات انڈسٹریل پارک میں قائم کی گئی ہیں۔
انہوں نے کہا کہ مذکورہ فیکٹریوں میں تقریبا 4 ملین امریکی ڈالر کی سرمایہ کاری کی گئی ہے اور فیکٹریوں میں مقامی سینکڑوں شہریوں کو روزگار کے مواقعے فراہم کیے جائیں گے۔ انہوں نے کہا کہ کابل سے 640 کلومیٹر دور ہرات صوبے میں مقامی مصنوعات کو بڑھانے اور روز گار کے مواقع پیدا کرنے کے لیے ملک میں صنعتوں کو فروغ دینے کے لیے اپنی کوششیں تیز کر دی ہیں۔
