نیشنل لیبر فیڈریشن پاکستان کے مرکزی صدر شمس الرحمان سواتی نے روزنامہ جسارت کے چیف ایڈیٹر سید اطہر ہاشمی کے انتقال پر گہرے انج وغم کا اظہار کرتے ہوئے ان کی شعبہ صحافت میں بے مثال خدمات پر زبردست خراج تحسین پیش کرتے ہوئے کہا کہ اطہر ہاشمی نے اردوصحافت کو عروج بخشا۔ان کے انتقال سے علم وادب کا ایک روشن چراغ گل ہو گیا ہے اور پاکستان ایک عظیم صحافی سے محروم ہوگیا ہے ۔ان کی شعبہ صحافت میں کی جانے والی خدمات کو کبھی بھی فراموش نہیں کیا جا سکے گا ۔انھوں نے اطہر ہاشمی کے اہلخانہ ،روزنامہ جسارت کے اسٹاف وکارکنان اور ہزاروں کی تعداد میں دنیا بھر میں پھیلے ہوئے ان کے شاگردوں سے بھی اطہر ہاشمی کے انتقال پر تعزیت کا اظہار کرتے ہوئے مرحوم کی مغفرت کی دعا کی۔
خالد خان‘ قاسم جمال و دیگر کی تعزیت
نیشنل لیبر فیڈریشن کراچی کے ایک نمائندہ وفد نے جنرل سیکرٹری محمد قاسم جمال کی قیادت میں روزنامہ جسارت کراچی کے چیف ایڈیٹر اطہر ہاشمی کی نماز جنازہ میں شرکت کی اور ان کے صاحبزادے اور چھوٹے بھائی سے تعزیت کا اظہار کیا۔نیشنل لیبر فیڈریشن کراچی کے صدر خالد خان‘ پیارے کے رہنما طاہر حسن اور شیخ مجید ‘ مزدور رہنما شفیق غوری نے بھی اطہر ہاشمی کے انتقال پر گہرے رنج وغم کا اظہار کرتے ہوئے اسے پاکستان کی صحافت کا ایک عظیم نقصان قرار دیتے ہوئے کہا کہ اطہر ہاشمی شرافت اور شائستگی کی پہچان تھے ۔انھوں نے اردو زبان کو عروج بخشا اور انھوں نے قلم کی حرمت کا پاس رکھا اور ان کی خدمات کو کبھی بھی فراموش نہیں کیا جا سکے گا۔