پاکستان کا بلیسٹک میزائل شاہین ٹو کا کامیاب تجربہ

94
راولپنڈی: بیلسٹک میزائل شاہین IIکامیابی سے اپنے ہدف کی جانب بڑھ رہا ہے
راولپنڈی: بیلسٹک میزائل شاہین IIکامیابی سے اپنے ہدف کی جانب بڑھ رہا ہے

اسلام آباد ( نمائندہ جسارت) پاکستان نے زمین سے زمین پر مار کرنے والے میزائل شاہین II کا کامیاب تجربہ کر لیا۔ تفصیلات کے مطابق پاکستان کی دفاعی صلاحیتوں میں دن بدن اضافہ ہوتا جا رہا ہے۔ پاکستان نے گزشتہ روز زمین سے زمین پر مار کرنے والے میزائل ”شاہین ٹو” کا کامیاب تجربہ کر لیا ہے۔ پاک فوج کے شعبہ تعلقات عامہ کے ڈی جی میجر جنرل آصف غفور نے بتایا کہ پاکستان نے بیلسٹک ”شاہین ٹو” میزائل کا کامیاب تجربہ کر لیا ہے۔میزائل نے بحرئہ عرب میں کامیابی سے ہدف کو نشانہ بنایا۔ یہ میزائل روایتی اور غیر روایتی ہتھیار سمیت ایٹمی ہتھیار کو بھی 1500 کلومیٹر تک لے جانے کی صلاحیت رکھتا ہے۔ ڈی جی آئی ایس پی آر میجر جنرل آصف غفور نے بتایا کہ شاہین ٹو میزائل سے پاکستان کی دفاعی صلاحیت مزید مضبوط ہو گی۔تجربے کا مقصد آپریشنل تیاریوں کو یقینی بنانا ہے۔ میزائل مکمل طور پر پاکستان کی اسٹریٹجک ضروریات کو پورا کرے گا۔ انہوں نے مزید کہا کہ پاکستان کا مضبوط دفاع خطے میں طاقت کا توازن برقرار رکھنے کے لیے ضروری ہے۔ شاہین ٹو کے کامیاب تجربے پر صدر مملکت ڈاکٹر عارف علوی اور وزیراعظم عمران خان نے چیئرمین جوائنٹ چیفس آف اسٹاف، مسلح افواج کے سربراہان، سائنسدانوں اور انجینئرزکو مبارکباد دی۔ خیال رہے کہ اس سے قبل گزشتہ ماہ پاک فضائیہ نے ملکی ساختہ میزائل کا کامیاب تجربہ کیا تھا۔تجربہ جے ایف تھنڈر17 طیارے سے کیا گیا تھا۔ ترجمان پاک فضائیہ کے مطابق پاک فضائیہ نے ملکی ساختہ میزائل کا کامیاب تجربہ کرکے دشمن کو خبردار کردیا کہ پاکستان کا دفاع ناقابل تسخیر ہے۔ میزائل طویل فاصلے پر اہداف کو نشانہ بنانے کی صلاحیت رکھتا ہے۔ ترجمان پی اے ایف نے بتایا تھا کہ جے ایف تھنڈر کو ملکی سطح پر تیار جدید میزائل سے لیس کردیا گیا۔ جدید میزائل دن اور رات میں اہداف کو نشانہ بنانے کی صلاحیت رکھتا ہے۔