کوئٹہ: بلوچستان میں بارشوں کا نیا اسپیل داخل ہوگیا۔ مکران اور ساحلی علاقوں میں آج رات سے تیز بارش کا سلسلہ شروع ہوگا۔ ندی نالوں میں طغیانی کا خدشہ ہے۔ شمالی اضلاع میں بارش اور پہاڑی علاقوں میں برفباری کا امکان ہے ۔
محکمہ موسمیات کا کہنا ہے کہ بلوچستان کے مکران،رخشان،کوئٹہ، سبی، نصیرآباد اور ژوب ڈویژن کے اضلاع میں وقفے وقفے سے تیز ہواؤں اور گرج چمک کے ساتھ بارش اور پہاڑوں پر برفباری کا امکان ہے ۔
پیش گوئی کے مطابق موسلادھار بارشوں کے باعث گوادر ، کیچ ، تربت اور پنجگور اور دیگر علاقوں میں برساتی نالوں میں طغیانی کا خدشہ ہے۔
محکمہ موسمیات کے مطابق بلوچستان کے شمالی اضلاع برفباری سے موسم سرد اور ٹریفک کی روانی متاثر ہونے کا اندیشہ ہے۔
