ماہرین آثار قدیمہ نے 800 سال پرانا لاکٹ دریافت کرلیا

283

برمنگھم: برطانیہ میں ایچ ایس 2 ہائی اسپیڈ ریل منصوبے پر کام کرنے والے ماہرینِ آثارِ قدیمہ نے 800 سال پُرانا ایک لاکٹ دریافت کیا ہے جس پر سونے کے تین شیر بنے ہوئے ہیں۔

خبر رساں اداروں کے مطابق 12ویں صدی عیسوی سے تعلق رکھنے والا یہ انمول خزانہ برمنگھم کے جنوب مشرق میں موجود واروِکشائر کے علاقے کے گاؤں وورملیٹن سے دریافت ہوا۔ اس لاکٹ میں لال رنگ پر تین سنہرے شیر بنے ہوئے ہیں۔ یہ ڈیزائن بالکل ویسا ہی ہے جیسا انگلش فٹبال ٹیم کی قمیص پر بنا ہوتا ہے۔

لاکٹ کی چوڑائی دو سینٹی میٹر اور لمبائی چار سینٹی میٹر سے تھوڑی زیادہ تھی اور اوپر کی جانب ایک کنڈا لگا ہے جس سے اسے باندھا جاتا تھا۔ ماہرینِ کا خیال ہے کہ جس وقت یہ لاکٹ کھویا اس وقت یہ ممکنہ طور پر نیا تھا۔ شیروں کو انگلینڈ کے نشان کے طور پراستعمال کیا جانا پہلے نارمن بادشاہ ولیم فاتح کے دور سے جُڑتا ہے جس نے 1066 عیسوی سے 1087 عیسوی تک حکومت کی۔