لاہور: دورہ جنوبی افریقا کیلئے منتخب قومی اسکواڈ میں شامل ایک کھلاڑی کا کورونا ٹیسٹ مثبت آ گیا ہے۔
پاکستان کرکٹ بورڈ کی جانب سے اعلامیے میں کہا گیا کہ دورہ جنوبی افریقا کے لیے منتخب اسکواڈ میں شامل مجموعی طور پر 35 کرکٹرز اور آفیشلز کے گزشتہ روز کورونا ٹیسٹ لیے گئے، 16 مارچ کو کروائی گئی اس ٹیسٹنگ میں فاسٹ بولر حسن علی کا ٹیسٹ مثبت آیا ہے جس کے بعد انہیں گھر میں رہنے کی ہدایت کردی گئی ہے۔
ذرائع کا کہنا ہے کہ 34 افراد جن کے کوویڈ 19 ٹیسٹ کی رپورٹ منفی آئی ہے وہ 18 مارچ بروز جمعرات کو لاہور پہنچ جائیں گے، قومی اسکواڈ کا تربیتی کیمپ 19 مارچ بروز جمعہ سے قذافی اسٹیڈیم لاہور میں شروع ہوگا۔
اعلامیے میں کہا گیا ہے کہ حسن علی کا دوبارہ جمعرات کو ان کی رہائشگاہ پر ٹیسٹ لیا جائے گا، اگر اس ٹیسٹ کی رپورٹ منفی آتی ہے تو انہیں لاہور آنے کی اجازت ہو گی اور پھر 2 روز کی آئسولیشن کے بعد تیسرا ٹیسٹ ہو گا۔
