لندن: ارجنٹینا اور اسپین کے کلب بارسیلونا سےتعلق رکھنے والےمعروف فٹ بالر لیونل میسی نے ریکارڈ چھٹی مرتبہ دنیا کے بہترین فٹ بالر کا اعزاز ‘ بیلن ڈی اور’ اپنے نام کرلیا ہے۔میسی نے پرتگال کے مایہ ناز فٹ بالر کریسٹیانو رونالڈو اور لیورپول کے ویرجل وین جیک کو مات دے کر یہ اعزاز اپنے نام کیا ہے۔
دس سال قبل 2009 میں میسی نے اپنے کریئر کا پہلا بیلن ڈی اور جیتا تھا اور آج ایک دہائی بعد بارسیلونا کے سپراسٹار نے چھٹا ایوارڈ جیت کر خود کو دنیا کا بہترین فٹ بالر ثابت کر دیا۔
میسی نے اپنے تاثرات بیان کرتے ہوئے کہا کہ10 سال قبل اپنے تین بھائیوں کی مدد سے میں نے اپنا ایوارڈ جیتا تھا اور آج چھٹا ایوارڈ اپنے نام کیا ہے جس میں میری بیوی اور بچوں کا کردار ہے۔ میری بیوی ہمیشہ کہتی ہے کہ خواب دیکھتے رہو، اور کھیل سے لطف اندوز ہوتے ہوئے اپنی کارکردگی میں بہتری لاتے رہو۔
میسی نے کہا کہ میں خود کو بہت خوش قسمت سمجھتا ہوں، میں جانتا ہوں کہ ایک دن میں نے ریٹائر ہو جانا ہے تاہم ابھی میرے پاس فٹ بال کھیلنےکیلئے کچھ سال باقی ہیں۔
