اسلام آباد:احتساب عدالت اسلام آباد میں توشہ خانہ گاڑیوں کے کیس میں نیب نے رپورٹ جمع کروانے کے لیے مہلت طلب کر لی۔
اسلام آباد کی احتساب عدالت کے جج ناصر جاوید رانا نے صدر مملکت آصف علی زرداری ، سابق وزیر اعظم نواز شریف، یوسف رضا گیلانی اور دیگر کیخلاف کیس کی سماعت کی ، عدالت میں نیب نے رپورٹ جمع کروانے کے لئے مہلت مانگ لی۔
دوران سماعت نیب پراسیکیوٹر اظہر مقبول شاہ نے کہا کہ نواز شریف نے شامل تفتیش کرنے کی درخواست دی تھی ، نواز شریف کو شامل تفتیش کرلیا گیا تھا، اب ہمارے تفتیشی افسر دستیاب نہیں ہیں، تفتیش کی روشنی میں رپورٹ پیش کریں گے کہ کیس چلایا بھی جاسکتا ہے یا نہیں ؟۔
نیب پراسیکیوٹر نے عدالت سے استدعا کی کہ آئندہ سماعت تک کا وقت دے، رپورٹ جمع کروا دیں گے، جس پر عدالت نے رپورٹ طلب کرتے ہوئے کیس کی سماعت 17اپریل تک ملتوی کردی ۔
