الخدمت کو عطیات دینے پر قوم اور اورسیز پاکستانیوں کا شکریہ ادا کرتے ہیں, میاں محمد اسلم

248

اسلام آباد: نائب امیر جماعت اسلامی پاکستان وسابق ممبر قومی اسمبلی میاں محمد اسلم نے کہا ہے کہ الخدمت فاؤنڈیشن کو سب سے زیادہ عطیات دینے پر پوری قوم اور اورسیز پاکستانیوں کا شکر یہ ادا کرتے ہیں، ان شاء اللہ بحالی کے مرحلے کے دوران بھی سیلاب متاثرین کے ساتھ رہیں گے۔

انہوں نے کہا کہ حکومت کی جانب سے اعلان کیے گئے فنڈز تاحال متاثرہ علاقوں تک نہیں پہنچے، ڈیزاسٹر مینجمنٹ کے ادارے بروقت امدادی کارروائیوں میں ناکام رہے ہیں۔ قوم سے اپیل ہے کہ وہ عطیات کا سلسلہ جاری رکھے تاکہ مصیبت میں اپنے بہن بھائیوں کو حتی المقدور ریلیف پہنچایا جا سکے۔اس وقت لاکھوں ایکڑ اراضی پانی میں ڈوبی ہوئی ہے،لاکھوں لوگ خیموں میں رہنے پر مجبور ہیں چند روز بعد سردی شروع ہو جائے گی تو عارضی ٹینٹس میں رہنا ناممکن ہو جائے گا۔

ان خیالات کا اظہار انہوں نے متاثرین سیلاب میں امدادی سامان تقسیم کر نے کی تقریب سے خطاب کر تے ہو ئے کیا ۔میاں محمد اسلم نے کہا سیلابی علاقوں میں بیماریاں پھیل رہی ہیں، حکومت کے پاس متاثرہ علاقوں کی بحالی کے لیے کوئی منصوبہ نہیں صرف بیرونی امداد کا انتظار ہے،حکمرانوں نے ہمیشہ کی طرح مصیبت کے وقت قوم کو تنہا چھوڑ دیا،حکومتی اقدامات نہ ہونے کے برابر تھے، ایسا دکھائی دے رہا ہے کہ ملک لاوارث ہے۔

انھوں نے کہا متاثرین کی بحالی کے لیے ایمرجنسی اقدامات اور سرکاری امداد کی شفاف تقسیم کا نظام وضع کیا جائے، تعمیر نو کے کاموں میں وفاقی اور صوبائی حکومتوں نے کوآرڈی نیشن قائم نہ کی اور آپسی لڑائیاں جاری رکھیں تو بحران بدترین شکل اختیار کر سکتا ہے۔