پنجاب میں تحریک لبیک سمیت 63 کالعدم تنظیموں پر کھالیں اور عطیات جمع کرنے پر پابندی عائد

109

لاہور: وزارت داخلہ پنجاب نے عیدالاضحی پر 63 سے زائد کالعدم تنظیموں کو عطیات دینے پر پابندی عائد کردی۔

وزارت داخلہ پنجاب نے کالعدم تنظیموں پر زکوة، عطیات، خیرات و صدقات لینے پر پابندی عائد کرتے ہوئے کہا کہ کالعدم تنظیمیں عید الاضحی پر کھالیں اکٹھی کرنے کی مجاز نہ ہوں گی، ان کالعدم تنظیموں کی فہرست میں لشکر جھنگوی، سپاہ صحابہ، سپاہ محمد پاکستان، جیش محمد، لشکر طیبہ، تحریک جعفریہ پاکستان، تحریک نفاذ شریعت محمد، القاعدہ، ملت اسلامیہ پاکستان، حزب التحریر، جمعیت انصار، جماعت الفرقان، انصارالاسلام، ٹی ٹی پی، لشکر اسلامی، جماعت الدعوة، جماعت الاحرار، آئی ایس آئی ایس، لشکر جھنگوی العالمی، ادارہ خدمت خلق، فلاح انسانیت فانڈیشن، الایثار فاؤنڈیشن، تحریک لبیک پاکستان اور دیگر تنظیمیں شامل ہیں۔

وزارت داخلہ پنجاب نے کہا کہ عیدالاضحی پر کھالیں، عطیات، صدقات، چندہ صرف چیریٹی کمیشن سے منظور شدہ تنظیمیں ہی جمع کرسکیں گی، خیراتی ادارے ضلعی انتظامیہ سے این او سی لئے بغیر کھالیں اکھٹی نہیں کرسکیں گے۔ وزارت داخلہ پنجاب نے کالعدم تنظیموں کی فہرست تمام تھانوں، ڈی سی اوز، ضلعی انتظامیہ کو ارسال کرتے ہوئے ہدایت کی کہ متعلقہ ڈی سی او سے اجازت نامہ والی تنظیمیں ہی عیدالضحی پر عطیات لے سکیں گی۔