بھارتی انتہا پسند ہندو جماعت شیوسینا نے حکمراں پارٹی بی جے پی سے سوال کیا ہے کہ کیا ملک میں برڈ فلو کی وباء پھیلانے میں بھی پاکستان کا ہاتھ ہے؟
بھاتی میڈیا کے مطابق شیوسینا کے ترجمان اخبار ‘سامنا’ کے اداریہ میں پارٹی نے بی جے پی کے کسانوں کے احتجاج پر دیے گئے بیان کو شدید تنقید کا نشانہ بنایا ہے۔
شیو سینا کا کہنا ہے کہ بی جے پی نے الزام لگایا ہے کہ پاکستان کسانوں کے احتجاج کی پشت پناہی کر رہا ہے اور پردے کے پیچھے یہ ان کو اکسا رہا ہے۔ سینا نے بی جے پی سے سوال کیا کہ کیا ملک میں برڈ فلو پھیلنے میں بھی کوئی پاکستان کا ہاتھ ہے؟
واضح رہے کہ بھارت کی 8 ریاستوں اترپردیش، دہلی، ہریانہ، ہماچل پردیش، مدھیہ پردیش، گجرات، راجستھان اور کیرالہ میں برڈ فلو کی تصدیق ہوگئی ہے۔