ریاض: سعودی حکومت نے کورونا وائرس کے پھیلاؤ کی روک تھام کے حوالے سے وزارت صحت کے وضع کردہ طریقہ کار کی خلاف ورزی کرنے والی 71 مساجد کو سیل کردیا۔
عرب میڈیا کے مطابق سعودی وزیر برائے مذہبی امور ڈاکٹرعبد اللطیف آل الشیخ نے خبر کی تصدیق کرتے ہوئے کہا کہ نمازیوں کی صحت سے متعلق احتیاطی تدابیر پر عمل پیرا نہ ہونے کے نتیجے میں 70 سے زائد مساجد سے وائرس پھیلا جس کے باعث ان مساجد کو بند کردیا گیا ہے۔
وزیر برائے مذہبی امور سماجی رابطے کی سائٹ پر ٹوئٹ کرتے ہوئے کہا کہ کورونا پروٹوکول اور صحت سے متعلق احتیاطی تدابیر کے عزم کی کمی کے نتیجے میں کچھ مساجد میں کورونا وائرس پھیلا جس کی وجہ سے مملکت کے مختلف علاقوں میں 71 مساجد کو بند کردیا گیا ہے۔
عدم التزام البعض بالبرتوكولات والاحترازات الصحية نتج عنه تسجيل إصابات بفيروس كورونا في بعض المساجد مما أدى -للأسف- لإغلاق ٧١ مسجدًا احترازيًا في مختلف مناطق المملكة، وجاري العمل على تعقيمها.
— د.عبداللطيف آل الشيخ (@Dr_Abdullatif_a) June 8, 2020
سعودی وزرات صحت کا کہنا ہے کہ سعودی عرب میں اب تک کورونا وائرس کے 1 لاکھ سے زائد کیسز ریکارڈ ہوچکے ہیں جبکہ 746 افراد زندگی کی بازی ہار چکے ہیں ۔
واضح رہے کہ گزشتہ روز سعودی عرب میں 34 افراد کورونا کا شکار ہوکر زندگی گنوا بیٹھے تھے۔