اسلام آباد: ایسے امیدواروں کے کاغذات نامزدگی جو چھپے ہوئے ہیں یا اشتہاری قرار دیے گئے ہیں اگر وہ 30 دسمبر تک جانچ پڑتال کے دوران اپنے متعلقہ ریٹرننگ افسران (آر اوز) کے سامنے پیش نہ ہوئے تو مسترد کیے جانے کا خطرہ ہے ۔
الیکشن کمیشن آف پاکستان (ای سی پی) کے ذرائع نے بتایا کہ 2024 کے عام انتخابات کے لیے کاغذات نامزدگی کی جانچ پڑتال آر اوز الیکٹورل اتھارٹی کے قواعد، ضوابط اور گائیڈنگ پیٹرن کے مطابق کریں گے۔
جانچ پڑتال آج شروع ہوگی اور یہ ہفتہ (30 دسمبر) تک چلے گی۔ ای سی پی کے مطابق کاغذات نامزدگی کی منظوری یا مسترد ہونے کے خلاف اپیلیں 3 جنوری 2024 تک دائر کی جا سکتی ہیں جن کا فیصلہ 10 جنوری 2024 تک کیا جائے گا۔
الیکشن کمیشن امیدواروں کی نظرثانی شدہ فہرست 11 جنوری 2024 کو شائع کرے گا جبکہ امیدوار 12 جنوری 2024 تک کاغذات واپس لے سکتے ہیں۔
