سوات: تحصیل مٹہ وینئی میں گھر سے 3 افراد کی لاشیں برآمد ہونے سے علاقے میں کہرام مچ گیا ، پولیس کا کہنا ہے کہ خواتین اور بچی کو تیزدھار آلے سے قتل کیا گیا۔
تفصیلات کے مطابق سوات کی تحصیل مٹہ وینئی میں گھر سے 3 افرادکی لاشیں برآمد ہوئیں ، پوسٹ مارٹم رپورٹ میں بتایا گیا کہ تینوں افرادکوتیزدھارآلے سے قتل کیا گیا۔پولیس نے مقتولہ کے بیٹے کی مدعیت میں نامعلوم افراد کے خلاف مقدمہ درج کرلیا ہے ، ابتدائی طور پر جنگلی جانور کے حملے میں تینوں افراد کی موت کا خدشہ ظاہر کیا گیا تھا۔
اس حوالے سے مینگورہ میں ڈی پی اوسوات زاہدنوازمروت نے پریس کانفرنس کرتے ہوئے بتایا کہ تحصیل مٹہ میں جنگلی جانورکے حملے کی خبرغلط نکلی، خواتین اوربچی کو تیزدھار آلے سے قتل کیا گیا۔ڈی پی اوسوات کا کہنا تھا کہ نامعلوم ملزمان کے خلاف مقدمہ درج کرکے تفتیش جاری ہے، جلد ملزمان کو گرفتار کرکے قانون کے کٹہرے میں لائیں گے۔
زاہدنواز نے بتایا کہ چار باغ میں پسند کی شادی کرنے والے کوہستانی جوڑے کے قاتل کو گرفتار کرلیا گیا ہے، ملزمان میں مقتولین کے بھائی اور مقتولہ کاچچاشامل ہیں۔ڈی پی او سوات نے کہا مجیب اورلاہوری بی بی نے چار ماہ قبل پسند کی شادی کی تھی، ملزمان کو عدالت میں پیش کرکے جیل بھجوا دیا گیا ہے
