کراچی (اسٹاف رپورٹر )بنگلا دیش میں پاکستان کے ہائی کمشنر عمران احمد صدیقی نے ڈھاکا چیمبر آف کامرس اینڈ انڈسٹری کے صدر رضوان رحمان سے ملاقات کے دوران بنگلا دیش کے ساتھ اقتصادی اور تجارتی تعلقات کو مستحکم کرنے کی پاکستان کی خواہش کا اظہارکیاہے۔ ہائی کمشنر عمران احمد صدیقی نے امید ظاہر کی کہ دونوں ممالک کے مابین مشترکہ اقتصادی کمیشن کا فورم جلد فعال ہوجائے گا۔ ہائی کمشنر نے کراچی سے چاٹوگرام بندر گاہ تک براہ راست شپمنٹ کی سہولت شروع کرنے کے علاوہ تجارت اور تجارت کو فروغ دینے کے لئے ڈھاکہ اور کراچی کے درمیان براہ راست پرواز دوبارہ شروع کرنے کی ضرورت پر بھی روشنی ڈالی۔ پاکستان کی فیشن انڈسٹری بنگلا دیش کے ٹیکسٹائل سیکٹر کے ساتھ مفید شراکت میں داخل ہوسکتی ہے۔ ہائی کمشنر نے دوطرفہ تعلقات کے تمام پہلوؤں کو فروغ دینے کے لئے اپنے مشن کی مضبوط عزم کا اعادہ کیا۔ ہائی کمشنر سے اتفاق کرتے ہوئے ڈھاکہ چیمبر آف کامرس اینڈ انڈسٹری کے صدر رضوان رحمان نے کہا کہ حال ہی میں ختم ہونے والی پہلی ڈی سی سی آئی بزنس کنکلیو -2021 میں پاکستانی تاجروں کی شرکت حوصلہ افزا ہے۔ انہوں نے سارک کے پلیٹ فارم سے بھی علاقائی تجارت کو فروغ دینے پر زور دیا۔
