لاہور: قائم مقام امیر جماعت اسلامی لیاقت بلوچ نے کہا ہے کہ حکومت قیام امن اور ملکی ترقی میں ناکام نظر آ رہی ہے۔
نوشکی بلوچستان میں دہشت گردی کے واقعے میں مزدوروں کے قتل کی پرزور مذمت کرتے ہوئے قائم مقام امیر جماعت اسلامی لیاقت بلوچ نے حکومت سے فوری تحقیقات اور مجرموں کو کیفرکردار تک پہنچانے کا مطالبہ کیا ہے۔
منصورہ سے جاری بیان میں انہوں نے لواحقین سے اظہار افسوس کیا ہے اور جاں بحق ہونے والے افراد کی مغفرت کے لیے دعا کی ہے۔ انہوں نے ملک کے مختلف علاقوں اور خصوصی طور پر بلوچستان اور خیبر پختوانخواہ میں دہشت گردی واقعات میں اضافہ پر انتہائی تشویش کا اظہار کرتے ہوئے حکمرانوں کو کہا ہے کہ عوام کے جان و مال کے تحفظ کو یقینی بنائیں۔
ان کا کہنا ہے کہ حکومت عوام کو سیکورٹی فراہم کرنے اور ملک میں امن عامہ کے قیام میں واضح طور پر ناکام نظر آرہی ہے۔ امن کے بغیر ترقی نہیں ہوسکتی اور ملک آگے نہیں بڑھے گا۔ انہوں نے مطالبہ کیا کہ حکومت جاں بحق افراد کے خاندانوں کی مالی مدد کرے۔
علاوہ ازیں لیاقت بلوچ نے بلوچستان، پنجاب اور خبر پختوانخوا میں بارشوں اور ژالہ باری میں ہونے والے جانی و مالی نقصان پر بھی افسوس کا اظہار کرتے ہوئے وفاقی و صوبائی حکومتوں پر زور دیا ہے کہ ایمرجنسی اقدامات کے تحت لوگوں کو ریلیف پہنچایا جائے اور متاثرین کی مدد کی جائے۔
انہوں نے بلوچستان میں باغات اور پنجاب میں گندم کی فصل کے نقصان پر کسانوں، کاشتکاروں کی حکومت کی جانب سے مدد کا بھی مطالبہ کیا ہے۔
