کراچی:جنگلی حیات کے عالمی ماہرین نے سفاری پارک کو ہاتھیوں کیلئے موزوں جگہ قرار دے دیا۔
فور پاز کے ڈاکٹر عامر خلیل نے کہا کہ دو ماہ میں ہتھنی مدھو بالا اور مزید دو ہاتھیوں کو منتقل کیا جاسکتا ہے،کراچی چڑیا گھر کی ہتھنی مدھو بالا کو دو ماہ میں سفاری پارک منتقل کرنے کی سفارش پر انتظامیہ راضی ہوگئی۔
ایڈمنسٹریٹر کراچی ڈاکٹر سیف الرحمان نے بتایا کہ فورپاز کی ٹیم کو سفاری پارک کا معائنہ کروایا گیا۔
فورپاز کے ڈاکٹرعامر خلیل کا کہنا ہے کہ سفاری پارک میں ہاتھیوں کے رہنے کی جگہ کو وسعت دینے کی ضرورت ہے، مجھے اس بات کو بیان کرتے ہوئے بیحد خوشی ہورہی ہے کہ کے ایم سی نے فورپاز کی سفارش پراتفاق کرلیا ہے اور ہتھنی مدھوبالا کو یہاں منتقل کرنے پر راضی ہوگئے ہیں لیکن مدھوبالا کو یہاں منتقل کرنے سے پہلے اس جگہ کو بہتر بنانا ہوگا۔
ڈاکٹرعامرخلیل نے کہا کہ یہ جگہ 50 سال سے زیادہ عرصے سے استعمال نہیں ہوئی ہے، یہ جگہ بہت بڑی ہے اور یہاں قدرتی ماحول بھی ہے، 2 ماہ میں ہتھنی کو یہاں منتقل کرنے کا مشن ناممکن نظر آرہا ہے، لیکن مشترکہ کوشش سے مدھوبالا اور دیگر 2 ہاتھیوں کو یہاں منتقل کیا جاسکتا ہے۔
واضح رہے کہ فورپاز کی ٹیم نے ہاتھیوں کے انکلوژر کو ساڑھے تین ایکڑسے بڑھا کر 10ایکڑ کرنے کی سفارش کی ہے۔ حال میں ہی انتقال کرنے والی ہتھنی نورجہاں نے کراچی چڑیا گھر میں 14 سال گزارے اور 17 سال کی عمر میں اس کا انتقال ہوا۔
