داسو ہائیڈرو پاور پروجیکٹ دریائے سندھ پر رن آف ریور پروجیکٹ ہے جو داسو ٹاؤن، ضلع کوہستان (بالائی)، خیبر پختون خوا کے 7 کلومیٹر اوپر کی طرف واقع ہے۔ یہ سائٹ مجوزہ دیامر بھاشا ڈیم سائٹ سے 74 کلومیٹر نیچے اور اسلام آباد سے 345 کلومیٹر دور ہے۔ پروجیکٹ 21,445GWh کی سالانہ توانائی کے ساتھ 4,320MW (12 یونٹس @ 360 میگاواٹ) پن بجلی پیدا کرے گا اور اسے دو (2) مراحل (مرحلہ-I&II) میں تیار کیا جائے گا۔ مرحلہ-1 12,222GWh کی سالانہ توانائی کے ساتھ 2،160MW (06 یونٹس @ 360MW) پیدا کرے گا۔
پاکستان معاشی بحران کا شکار ہے جس کی ایک وجہ توانائی کا بحران ہے، وطن عزیز میں اس وقت تین بڑے منصوبے زیر تعمیر ہیں جو توجہ کے طالب ہیں۔ دیامر بھاشا ڈیم، مہمند ڈیم اور داسو ہائیڈرو پاور پروجیکٹ۔ یہ تینوں منصوبے پاکستان کے لیے انتہائی اہم ہیں آج ہم تذکرہ کریں گے داسو ہائیڈرو پاور پروجیکٹ کا جو حکام بالا کی خصوصی توجہ کا طالب ہے۔ کیونکہ یہ منصوبہ تاخیر کا شکار ہے، داسو ہائیڈرو پاور پروجیکٹ کا (اسٹیج -1) 2160 میگاواٹ ہائیڈل بجلی پیدا کرنے کی صلاحیت رکھتا ہے۔ اس منصوبے پر 100 ارب ڈالر سے اخراجات میں اضافے کا امکان ہے۔ اس منصوبے کو 24-2023 میں مکمل ہونا تھا اب 27-2026 میں مکمل ہوگا جس کی کئی وجوہات ہیں۔ زمین کے حصول میں ناکامی، کورونا، اور منصوبے کے مقام پر چینی اہلکاروں کو لے جانے والی بس پر حملہ تین سال کی تاخیر کا سبب بنا۔ وزارت پانی اور وسائل اور واپڈا جلد ہی منصوبہ بندی کمیشن کو سی ڈی ڈبلیو پی اور ای سی این ای سی کی منظوری کے لیے لاگت میں اضافے کا نظرثانی شدہ PC-1 پیش کریں گے۔ یہ منصوبہ 2014 میں 586 ارب روپے کی لاگت سے منظور کیا گیا تھا۔ ورلڈ بینک نے بھی فنڈنگ کی ہے، جو کل لاگت کے 20 فی صد کے برابر ہے۔ اب نئے منظر نامے میں تین سال کے دوران لاگت میں 100 ارب روپے اضافے کا ہوگا۔ اس سے منصوبے کی لاگت تقریباً 686 ارب روپے تک بڑھ جائے گی۔
اس سے بھی اہم بات یہ ہے کہ 14 جولائی 2021 کو چینی کنٹریکٹر کے عملے کی بس پر حملہ ہوا جس کے نتیجے میں متعدد افراد ہلاک اور زخمی ہوئے جس کی وجہ سے تقریباً چار ماہ تک کام مکمل طور پر معطل رہا۔ واپڈا اور حکومت کی ٹھوس کوششوں کے بعد 25 اکتوبر 2021 کو دوبارہ کام شروع ہوا۔ اس تاخیر نے ریور ڈائیورژن کے اہم سنگ میل کے طور پر تعمیراتی شیڈول کو بری طرح متاثر کیا ہے جو پہلے نومبر۔ دسمبر 2021 میں طے کیا گیا تھا۔ دسمبر 2022 تک چلا گیا جس کی وجہ سے ایک سال کی تاخیر ہوئی۔
واپڈا ہائیڈرو الیکٹرک کمپنی نے نیشنل الیکٹرک پاور ریگولیٹری اتھارٹی (نیپرا) سے ریگولیٹر کے پاس اپنی درخواست میں سی او ڈی (کمرشل آپریشن کی تاریخ) میں 27-2026 تک تین سال کی توسیع کی درخواست کی ہے۔ ڈیم اور آبی ذخائر کے حصے کے لیے زمین ابھی تک مکمل طور پر حاصل نہیں کی گئی ہے۔ چونکہ یہ زمین غیر آباد علاقے کے تحت آتی ہے اور محکمہ ریونیو اب تک زمین کے مالکان کا پتا لگانے میں ناکام رہا ہے۔ ایسی زمین قبائل کی ملکیت ہے۔ لہٰذا زمین کا حصول ایک مشکل کام بن گیا ہے، یہی وجہ ہے کہ زمین کے حصول کے مسائل کی وجہ سے منصوبے پر کام کی رفتار سست رہی جو کے پی کے کی صوبائی حکومت اور کوہستان اپر کی ضلعی انتظامیہ کی ذمے داری ہے لینڈ ایکوزیشن ایکٹ 1894 کے مطابق منصوبے پر عمل درآمد کے لیے اسے واپڈا کے سپرد کیا گیا۔ 2019 میں حصول اراضی کے مسائل کے حل میں کافی وقت اور محنت لگ گئی، جس کے نتیجے میں یہ منصوبہ تقریباً تین سال تک تاخیر کا شکار رہا۔ منصوبے کے لیے درکار زمین کا تقریباً 85 فی صد حصہ اب تک حاصل کر لیا گیا ہے جس میں اہم سول کاموں کے لیے درکار ترجیحی علاقے بھی شامل ہیں۔ باقی زمین آبی ذخائر کے علاقے میں آتی ہے جس سے منصوبے کی رفتار متاثر نہیں ہوگی۔ ورلڈ بینک نے ضلعی انتظامیہ کو بار بار ٹائم لائن میں توسیع کی اجازت دینے کے باوجود 4320 میگاواٹ کے داسو ہائیڈرو پاور پروجیکٹ کے لیے زمین کے حصول کی رفتار پر عدم اطمینان کا اظہار کیا ہے۔ ان وجوہات کی وجہ سے منصوبے کے ڈیزائن کو بھی تبدیل کرنے کی ضرورت ہے۔ سرکاری تفصیلات کے مطابق، مجموعی طور پر تیاری کا کام تقریباً 50 فی صد مکمل ہو چکا ہے جس میں پروجیکٹ کالونی، ایکسس انفرا اسٹرکچر اور 132Kv ٹرانسمیشن لائن شامل ہے۔ مین سول ورکس کا ٹھیکہ چین کی کمپنی چائنا گیزوبا گروپ کمپنی (CGGC) کو دیا گیا تھا اور داسو ہائیڈرو پاور پروجیکٹ اسٹیج-I پر کام 23 جون 2017 کو شروع ہوا تھا، جو جون 2023 تک مکمل ہونے کی امید تھی۔ ابتدائی طور پر اہم سول ورکس پر کام کی رفتار سست رہی تاہم 2019 میں حصول اراضی کے کچھ مسائل کے حل کے بعد، پروجیکٹ پر کام آسانی سے جاری تھا اور 14 جولائی 2021 تک کورونا کے درمیان رفتار پکڑتا رہا، جب چینی کنٹریکٹر کے عملے کی بس پر حملے کے نتیجے میں اگلے تقریباً چار ماہ تک کام مکمل طور پر معطل ہو گیا۔
داسو ہائیڈرو پاور پروجیکٹ میں اربوں روپے کی مالی بے ضابطگیاں پبلک اکاؤنٹس کمیٹی (پی اے سی) کے سامنے بے نقاب ہوئیں ہیں۔ جس میں کمیٹی نے وزارت آبی وسائل کی آڈٹ رپورٹ برائے سال 20-2019 کا جائزہ لیا۔ کمیٹی نے ڈیموں کی تعمیر اور بھاشا ڈیم، داسو، مہمند، نیلم جہلم اور K-IV منصوبوں سمیت دیگر پانچ منصوبوں کے فرانزک آڈٹ کا مشورہ دیا۔ آڈٹ حکام کے مطابق سال 17-2016 میں 22.88 ارب روپے کی لاگت سے تین کنٹریکٹس کو حتمی شکل دی گئی۔ 4 ارب 58 کروڑ روپے کی ایڈوانس رقم ٹھیکیداروں کو دی گئی لیکن 5 سال گزرنے کے باوجود ترقیاتی کام شروع نہیں ہوئے۔ یہ بھی انکشاف ہوا کہ وزارت کی جانب سے 114 افراد کو کنٹریکٹ کی بنیاد پر بھرتی کیا گیا تھا، چیئرمین پی اے سی نے قومی خزانے پر مالی بوجھ کم کرنے کے لیے کنٹریکٹ ملازمین کو فوری طور پر فارغ کرنے کی ہدایت کی تھی لیکن اس پر بھی مکمل ابھی تک عمل درآمد نہیں کیا گیا۔
موجودہ پروگریس کا جائزہ لیا جائے تو کچھ امید نظر آتی ہے، داسو ہائیڈرو پاور پروجیکٹ کا ’’کریٹیکل ڈائیورژن سسٹم ’’مئی 2023 تک مکمل ہو جائے گا۔ منصوبے کی تفصیلات کے مطابق سی جی جی سی تعمیراتی کمپنی آر سی سی ڈیم اور منصوبے کے الائیڈ ہائیڈرولک ڈھانچے کو انجام دے ر ہی ہے۔ زیر زمین پاور ہاؤس اور الائیڈ ہائیڈرولک ڈھانچے کی تعمیر؛ ڈیم سائٹ سے اترگاہ تک دائیں کنارے تک رسائی کی سڑک، قراقرم ہائی وے RD 25200 کو آر ڈی 62213 میں منتقل کرنا شامل ہے۔ چائنا سول انجینئرنگ کنسٹرکشن کارپوریشن رائٹ بینک ایکسس روڈ کی تعمیر کے مختلف حصوں پر کام کر رہی ہے۔ اسی طرح دوبئیر سے داسو تک 132 کے وی ٹرانسمیشن لائن کی تعمیر پاور کنسٹرکشن کارپوریشن آف چائنا لمیٹڈ کر رہی ہے۔ داسو پاکستان میں اوسطاً 21 بلین یونٹ کے ساتھ سب سے زیادہ سالانہ توانائی پیدا کرنے والا منصوبہ بن جائے گا۔
