ابوظبی(مانیٹرنگ ڈیسک) اسرائیلی صدر اسحاق ہرزوگ اہلیہ کے ہمراہ2روزہ سرکاری دورے پرمتحدہ عرب امارات پہنچ گئے۔عالمی خبر رساں ادارے کے مطابق یہ کسی بھی اسرائیلی صدر کا یو اے ای کا پہلا دورہ ہے۔ائرپورٹ پر اسرائیلی مہمانوں کا پْرتپاک استقبال وزیر خارجہ شیخ عبداللہ بن زائد النہیان نے کیا۔اس موقع پر میڈیا سے گفتگو میں اسرائیلی صدر نے بتایا کہ وہ ولی عہد شیخ محمد بن زائد النہیان کی ذاتی دعوت پر متحدہ عرب امارات آئے ہیں۔سرکاری دورے کے دوران اسرائیلی صدر ولی عہد کے علاوہ دبئی کے حکمراں محمد بن راشد المکتوم سے بھی ملاقات کریں گے۔ایک ماہ قبل اسرائیل کے وزیر اعظم نفتالی بینیٹ نے بھی متحدہ عرب امارات کا سرکاری دورہ کیا تھا۔واضح رہے کہ دونوں ممالک کے دوران سفارتی و تجارتی تعلقات سابق امریکی صدر ڈونلڈ ٹرمپ کی ثالثی میں گزشتہ برس بحال ہوگئے تھے۔
