پاکستان کھیلوں کے حوالے سے پر امن ملک ہے،ڈاکٹر فہمیدہ مرزا

اسلام آباد(جسارت نیوز)وفاقی وزیر، بین الصوبائی رابطہ ڈاکٹر فہمیدہ مرزا نے کہا ہے کہ پاکستان کھیلوں کے حوالے سے پر امن ملک ہے اور اب یہاں غیر ملکی کھلاڑی بھی آ رہے ہیں، پاک جاپان ڈیوس کپ ٹائی آج جمعہ سے پاکستان اسپورٹس کمپلیکس، اسلام آباد کے گراس کورٹ میں شروع ہوگا۔ ان خیالات کا اظہار انہوں نے گذشتہ روز میڈیا سے گفتگو کرتے ہوئے کیا۔ انہوں نے کہا کہ اعصام الحق اور عقیل خان سمیت دوسرے کھلاڑی ڈیوس کپ ٹائی میں جاپان کے خلاف جیت کے لئے بہت پر عزم ہیں، انہوں نے کہا کہ میں پاکستان کی عوام کو خوش خبری دینا چاہتی ہوں کہ ہمارے ملک میں انٹرنیشنل ٹینس کے کھلاڑی آ ئے ہوئے ہیں اور آج سے ڈیوس کپ شروع ہونے جا رہا ہے، جاپان ٹیم 25 آفیشلز و کھلاڑیوں پر مشتمل ہے۔ وفاقی وزیر نے کہا کہ میرے لئے یہ خوش آئند بات ہے کہ میرے ہوتے ہوئے یہ دوسرا ڈیوس کپ یہاں اسلام آباد میں منعقد ہو رہا ہے۔ انہوں نے کہا کہ ہم انٹرنیشنل ٹینس فیڈریشن کے شکرگزار ہیں کہ جنہوں نے پاکستان کو انٹرنیشنل ٹورنامنٹ کی میزبانی دی، انہوں نے کہا کہ حکومت، وزارت بین الصوبائی رابطہ اور پاکستان اسپورٹس بورڈ نے ڈیوس کپ ٹائی کے لئے پاکستان ٹینس فیڈریشن کو ہر ممکن سہولیات فراہم کردی ہیں اور ان سہولیات کی انٹرنیشنل ٹینس فیڈریشن نے بھی تعریف کی ہے، انہوں نے امید ظاہر کی کہ پاکستانی کھلاڑی پوری محنت سے کھیل کر ملک کا نام روشن کریں گے ، پاک جاپان ڈیوس کپ ٹائی ہمارے ملک کا مثبت تشخص اجاگر کرنے میں اہم کردار ادا کرے گا اور امید کرتی ہوں کہ یہ بہت اچھا ٹورنامنٹ ہوگا۔ انہوں نے کہا کہ ہاک آئی ٹیکنالوجی بھی متعارف کروا رہے ہیں، ہاک آئی ٹیکنالوجی پاکستان میں پہلی مرتبہ ڈیوس کپ میں استعمال کی جا رہی ہے اس ٹیکنالوجی سے غلطی کے امکانات نہیں ہوتے۔ انہوں نے کہا کہ ہمارا خوبصورت ملک اور پاکستان اسپورٹس کمپلیکس اسلام آباد کا سر سبز گرائونڈ بھی قابل ستائش ہے ۔