کراچی کیلیے پروگام کو پاک فوج کی مکمل حمایت حاصل ہوگی ، جنرل باجوہ

172

 

کراچی/راولپنڈی(اسٹاف رپورٹر+ مانیٹرنگ ڈیسک) آرمی چیف جنرل قمر جاوید باجوہ نے کہا ہے کہ پاک فوج عوام کو مشکل گھڑی میں مایوس نہیں کرے گی، کراچی کے لیے وفاق اور صوبائی حکومت کے پروگرام کو فوج کی مکمل حمایت حاصل ہوگی۔پاک فوج کے شعبہ تعلقات عامہ (آئی ایس پی آر) کے مطابق پاک فوج کے سپہ سالار جنرل قمر جاوید باجوہ 2 روزہ دورے پر کراچی پہنچ گئے ہیں جہاں انہوں نے بارش
سے متاثرہ علاقوں کا فضائی جائزہ لیا۔آرمی چیف جنرل قمر جاوید باجوہ کور ہیڈ کوارٹرز پہنچے جہاں کور کمانڈر کراچی لیفٹیننٹ جنرل ہمایوں عزیز نے ان کا استقبال کیا۔ آرمی چیف کو کراچی میں بدترین سیلابی صورتحال، سندھ میں ہنگامی صورتحال سے نمٹنے کے لیے انتظامیہ سے تعاون، آبادی کے بے ہنگم پھیلاؤ اور انفرااسٹرکچر کی وجہ سے پیدا مسائل پر بریفنگ دی گئی۔اس موقع پر آرمی چیف جنرل قمر جاوید باجوہ کا اپنے خطاب میں کہنا تھا کہ ایسی قدرتی آفات کا مقابلہ کوئی شہر نہیں کر سکتا۔ ہمارا مسئلہ وسائل کی کمی نہیں بلکہ درست ترجیحات ہیں۔آرمی چیف نے کہا کہ قدرتی آفات ترجیحات درست کرنے کا موقع فراہم کرتی ہیں۔ ترجیحات درست کرنے سے بڑے نقصانات سے بچا جا سکتا ہے۔ کراچی کے لیے پروگرام کو پاک فوج کی مکمل حمایت حاصل ہوگی۔انہوں نے کراچی میں جاری امدادی سرگرمیوں پر اطمینان کا اظہار کرتے ہوئے عوامی مقامات اور زیادہ متاثرہ علاقوں میں امدادی سرگرمیاں تیز کرنے کی ہدایت کی۔ان کا کہنا تھا کہ امدادی سرگرمیوں کے لیے وسائل کا استعمال زیادہ متاثر ہونے والے علاقوں میں ہونا چاہیے۔ یہ قدرتی آفت ہے، سب متحد رہیں۔ پاک فوج عوام کو مشکل گھڑی میں مایوس نہیں کرے گی۔