افغان طالبان کے سیاسی امور کے رہنما سراج الدین حقانی نے کہا ہے کہ امریکا کے ساتھ جلد امن معاہدہ طے پانے کا عندیہ دیتے ہوئے کہا ہے کہ بہت جلد افغان عوام امن معاہدے کے حوالے سے خوشی منائیں گے۔
امریکی اخبار میں لکھے گئے مضمون میں سراج الدین حقانی نے کہا کہ امریکا اور اتحادیوں کے خلاف دفاع کے سوا طالبان کے پاس کوئی چارہ نہیں تھا، اب وقت آگیا ہے کہ تشدد کا باب بند ہونا چاہیے۔
انہوں نے لکھا کہ افغانستان سے غیرملکی افواج کا انخلا ہمارا بنیادی مطالبہ تھا، اب امریکا کے ساتھ امن معاہدے کے قریب ہیں اور افغان عوام کو معاہدے سے متعلق جلد خوشی ملے گی، یہ کوئی معمولی بات نہیں ایک بہت بڑا سنگ میل ہے۔
سراج الدین حقانی نے کہا کہ افغان شہریوں پر امریکا کی بمباری کے باعث بہت زیادہ دباؤ تھا، لیکن اس کے باوجود طالبان کی مذاکراتی کمیٹی نے ہرممکن کوشش کی اور معاہدے کو نتیجہ خیز بنانے کے لیے انتھک محنت کی ہے۔
انہوں نے لکھا کہ ہم نئی خوشیوں کا آغاز کریں گے، ہم سب افغان بہن بھائی مل کر نئے اور پرامن، خوشحال افغانستان کی بنیاد رکھیں گے، تمام جلاوطن افغانیوں کو واپس آنے کی دعوت دی جائے گی۔