برسلز: یورپین یونین نے عالمی عدالت انصاف کے اسرائیل کے خلاف فیصلے کو اہم قرار دیتے ہوئے اس فیصلے کے بڑے نکات کو بھر پور انداز میں اجاگر کیا ہے۔
یورپی یونین نے مطالبہ کیا ہے کہ اسرائیل اس حکم کو نافذ کرنے کے لیے تمام اقدامات کے بارے میں عدالت کو رپورٹ بھی پیش کرے۔
اس حوالے سے یورپین خارجہ امور کے سربراہ جوزپ بوریل نے اپنے سوشل میڈیا اکاؤنٹ ایکس پر جاری کردہ پیغام میں عالمی عدالت انصاف کے فیصلے کے 4 نکات کو نمایاں طور پر آگے بڑھایا۔
اپنے پیغام میں انہوں نے تحریر کیا کہ ہم یعنی یورپین یونین، جنوبی افریقہ کی جانب سے لائے گئے مقدمے میں انٹرنیشنل کورٹ آف جسٹس کے اسرائیل کے خلاف حکم کو نوٹ کرتے ہیں کہ اسرائیل رفح گورنری میں اپنے فوجی حملے کو فوری طور پر روک دے۔ وہ رفح کراسنگ کو انسانی امداد کے لیے کھلا رکھے۔ اسرائیل نسل کشی کے الزامات کی تحقیقات کیلیے اقوام متحدہ کے کسی بھی لازمی تفتیشی ادارے تک رسائی کو یقینی بنائے۔ اسرائیل اس حکم کو نافذ کرنے کے لیے تمام اقدامات کے بارے میں عدالت کو رپورٹ بھی پیش کرے۔
پیغام کے آخر میں یورپین خارجہ امور کے سربراہ نے اس بات کو خاص طور پر اجاگر کیا کہ آئی سی جے کے احکامات کیلیے فریقین پابند ہیں اور انہیں مکمل اور مثر طریقے سے لاگو کرنا ہوگا۔
