اسلام آباد: وزیر اطلاعات و نشریات عطا تارڑ نے کہا ہے کہ محاذ آرائی کی سیاست کرنے والے سیاسی بیان بازی کے ذریعے ماحول خراب کرنے کی کوشش کر رہے ہیں۔
اسلام آباد میں پریس کانفرنس کرتے ہوئے وزیر اطلاعات و نشریات عطا تارڑ نے کہا کہ وفاق اور اکائیوں کو مل کر چلنا ہے، ہم جہاں جاتے ہیں سرمایہ کاری اور تجارت کی بات کرتے ہیں ، وزیرِ اعظم شہباز شریف نے واضح طور پر کہا ہے کہ ہمیں امداد نہیں چاہیے۔
عطا تارڑ کا کہنا تھا کہ ہماری کامیابیاں مخالفین کو ہضم نہیں ہو رہیں، جنہوں نے آئی ایم ایف کو خط لکھا وہ اب ایس آئی ایف سی کے خلاف مہم چلا رہے ہیں، منفی پروپیگنڈے کے باوجود پاکستان میں سرمایہ کاری ہو کر رہے گی، ملک کو تباہی و بربادی کی طرف لے کر جانے والے عناصر کی عزائم کامیاب نہیں ہوں گے، آئین کی خلاف ورزی کرنے والوں کیلئے کوئی جگہ نہیں۔
انہوں نے کہا کہ وزیرِ اعظم شہباز شریف کا متحدہ عرب امارات کا دورہ انتہائی کامیاب رہا،آپ نے ایک شخصیت کو ریڈ لائن ڈکلیئر کیا تھا کہ ہماری ریڈ لائن ایس آئی ایف سی ہے، ایس آئی ایف سی کے تحت سرمایہ کاری پر بھرپور کام ہو رہا ہے، ایک سیاسی جماعت ملک کے روشن مستقبل کی راہ میں رخنہ ڈالنے کی کوشش کر رہی ہے، ایس آئی ایف سی سنجیدہ فورم ہے، محاذ آرائی کی سیاست کرنے کی کوشش کرنے والے سیاسی بیان بازی کے ذریعے ماحول خراب کرنے کی کوشش کر رہے ہیں۔
ان کا کہنا تھا کہ وفاق تمام صوبوں کے ساتھ مل کر کام کرنا چاہتا ہے، سیاسی شعبدہ باز محاذ آرائی میں آگے نکل چکے ہیں، جو ماحول انہوں نے پیدا کیا ہے اس میں ان سے کیا بات کی جا سکتی ہے؟
