اسلام آباد: ملک بھر میں بجلی کا شارٹ فال مزید بڑھنے کے بعد 6 ہزار 623 میگاواٹ تک پہنچ گیا۔
تفصیلات کے مطابق ملک میں بجلی کی طلب 25 ہزار 800 میگاواٹ ہے، جبکہ بجلی کی پیداوار 19 ہزار 177 میگاواٹ ہے۔
ذرائع کے مطابق پن بجلی ذرائع سے 5 ہزار100 میگاواٹ بجلی پیدا ہورہی ہے، سرکاری تھرمل پاور پلانٹس 1000 میگاواٹ بجلی پیدا کررہے ہیں، نجی شعبے کے بجلی گھروں کی پیداوار 8 ہزار 650 میگاواٹ ہے۔
ذرائع کا کہنا ہے کہ ونڈ پاور پلانٹس سے 870 میگاواٹ بجلی پیدا ہورہی ہے، سولر پاور پلانٹس سے197 بگاس سے 138 اورنیوکلئیر پاور پلانٹس سے 3 ہزار 222 میگاواٹ بجلی پیدا ہورہی ہے۔
ذرائع کا مزید کہنا تھا کہ شارٹ فال کے باعث دیہی علاقوں میں 8 گھنٹے تک لوڈشیڈنگ جاری ہے جبکہ شہری علاقوں میں لوڈشیڈنگ کا دورانیہ 4 سے 6 گھنٹے تک پہنچ گیا۔
