اسلام آباد: بین الاقوامی مالیاتی فنڈ (آئی ایم ایف) کے ساتھ نئے قرض پروگرام پر مذاکرات نہیں ہوسکے۔
ذرائع کے مطابق آئی ایم ایف سے نئے قرض پروگرام کے لیے مذاکرات کا آغاز قرض اہداف کی پارلیمنٹ سے منظوری کے بعد ہوگا۔
میڈیا رپورٹس کے مطابق آئی ایم ایف وفد کے ساتھ پاکستانی حکام کے مذاکرات کا آج آخری دن ہے، نئے قرض پروگرام کے لیے مذاکرات جون کے آخر میں شروع ہوں گے، آئی ایم ایف وفد کے ارکان بغیر کسی اعلان کے 48 گھنٹوں میں واپس روانہ ہو جائیں گے۔
رپورٹس میں یہ بھی بتایا جا رہا کہ آئی ایم ایف کے ساتھ حالیہ مذاکرات قرض پروگرام کے لیے نہیں تھے۔
رپورٹ کے مطابق یہ پہلی بار ہو گا کہ پاکستان مذاکرات سے پہلے آئی ایم ایف کے تمام مطالبات پر عمل درآمد شروع کر دے گا یا پاکستان اہداف اور خدو خال کی پارلیمنٹ سے منظوری کرا کے ان پر عمل درآمد کی تاریخ کا تعین کرے گا۔
اس حوالے سے ذرائع کا یہ بھی کہنا ہے کہ آئی ایم ایف اور پاکستان کی کوشش ہے کہ یکم جولائی سے پہلے معاہدہ ہو جائے۔
