راولپنڈی: کرغزستان میں پھنسے طلبا کی مشکلات بدستور جاری ہیں، حکومت کی جانب سے طلبا کو وطن واپس لانے کے لیے کوئی پلان سامنے نہ آنے کے بعد طلبا کے والدین کافی پریشان ہوگئے۔
میڈیا رپورٹس کے مطابق کرغزستان میں پھنسے طلبا ہاسٹلز سے نکلنے کے بعد ائیر پورٹ پر پھنس گئے ہیں، طلبہ نے سوشل میڈیا فار پر اپنے پیغامات میں کہا ہے کہ بشکیک سے اسلام آباد آنے والی فلائٹ سے این کے 6575 منسوخ کردی گئی ہے۔
انہوں نے کہاکہ پرواز منسوخی پر ہم مناس ائیر پورٹ پر پھنس چکے ہیں نہ پاکستان آسکتے ہیں نہ واپس جاسکتے ہیں، آج پاکستان کے لیے ایک پرواز کے سوا کسی پرواز کو اجازت نہیں مل سکی، ہم وزیراعظم اور وزیر ہوابازی سے فوری نوٹس کا مطالبہ کرتے ہیں۔
خیال رہے کہ مناس سے فلائٹ کو 125 طلبہ کو لے کر آج 11 بجے اسلام آباد کے لیے ٹیک آف کرنا تھا لیکن تاحال فلائٹ ٹیک آف نہیں کرسکی۔
دوسری جانب سول ایوی ایشن کے ترجمان کا کہنا تھا کہ خصوصی فلائٹس کی آمد ورفت وزرات خارجہ کی ہدایات سے مشروط ہے، وزارت خارجہ اور ہوابازی کی ہدایات کی بعد ریگولیٹری تقاضے مکمل ہونے پر فلائٹس آپریٹ ہوتیں ہیں۔
