کوئٹہ: بلوچستان میں مسلمان طلبہ کے لیے قرآن کی تعلیم کو لازمی قرار دے دیا گیا۔
نجی ٹی وی کی رپورٹ کے مطابق بلوچستان حکومت نے صوبے میں مسلمان طلبہ کے لیے اسکولوں میں قرآن کی تعلیم لازمی قرار دےدی۔
ترجمان بلوچستان حکومت شاہد رند کے مطابق وزیراعلیٰ سرفراز بگٹی کی زیر صدارت صوبائی کابینہ کا اجلاس 21 اور 22 مئی کو ہوا، جس میں کابینہ اراکین نے مختلف منصوبوں کی منظوری دی۔
انہوں نے کہا کہ کابینہ نے مسلمان طالب علموں کے لیے قرآن کی تعلیم کو لازمی قرار دیا جس کے بعد اسکولوں میں دیگر مضامین کے ساتھ قرآن مجید کی تعلیم بھی دی جائے گی۔اس کے علاوہ کابینہ نے انتظامی امور اور مفاد عامہ سے متعلق منصوبوںکی منظوری دی جب کہ تعلیم اور صحت کے شعبوں میں بہتری کے لیے وزیراعلیٰ نے جامع سفارشات مرتب کرنے کی ہدایت کی ہے۔
وزیراعلیٰ نے دونوں شعبوں میں افسران اور ملازمین کی ترقیوں کو کارکردگی سے مشروط کردیا اس کے علاوہ کابینہ نے کم عمری میں شادی کی روک تھام اور گھریلو تشدد کے خاتمے کے لیے ترمیمی بل کی منظوری بھی دے دی۔
