کراچی:ملکی تاریخ میں پیاز کی برآمد کا نیا ریکارڈ قائم ہوگیا۔
نجی ٹی وی کی رپورٹ میں بتایا گیا ہے کہ ملکی تاریخ میں کسی بھی پھل یا سبزی کے مقابلے میں پیاز کی برآمدات ریکارڈ سطح پر پہنچ چکی ہے۔ اس حوالے سے پاکستان فروٹ اینڈ ویجیٹیبل ایکسپورٹرز ایسوسی ایشن کی جانب سے بتایا گیا ہے کہ جولائی تا اپریل 2024ء ملک سے پیاز کی برآمدات 21 کروڑ ڈالر سے متجاوز ہو چکی ہیں۔
قبل ازیں ملکی تاریخ میں صرف کینو کی زیادہ برآمدات تھیں جو کہ 210 ملین ڈالر رہی ہیں، رواں برس کے اختتام تک پیاز کی ایکسپورٹ 250ملین ڈالر تک پہنچ جائے گی۔
بیان میں مزید کہا گیا ہے کہ بھارتی پیاز کی ایکسپورٹ پر پابندی عائد ہونے سے پاکستان کو نئی منڈیاں ملی ہیں۔ پاکستانی پیاز کو مشرق بعید، مشرق وسطیٰ سمیت دنیا کی بڑی منڈیوں میں رسائی حاصل ہوئی ہے، دنیا کے سرفہرست اسٹورز میں بھی آج پاکستانی پیاز فروخت کے لیے موجود ہے۔
وحید احمد نے کہا کہ حکومت کو پیاز کی لائف بڑھانے کے لیے بھی اقدامات کرنے ہوں گے کیونکہ آنے والے وقتوں میں پاکستانی پیاز کی نئی مارکیٹ ڈیولیپ کر سکتے ہیں۔
