ٹی20 ورلڈکپ سے قبل میزبان ٹیم امریکا نے بنگلہ دیش کو سیریز کے پہلے ٹی ٹوئنٹی انٹرنیشنل میچ میں شکست دے کر کرکٹ کی تاریخ کا بڑا اپ سیٹ کردیا۔
امریکا کے شہر ہیوسٹن میں ہونے والے 3 میچوں پر مشتمل سیریز کے پہلے ٹی20 انٹرنیشنل میں آئی سی سی کی ٹاپ 10 ٹیموں کی رینکنگ میں سے ایک بنگلادیش کیخلاف امریکا نے پہلی فتح حاصل کر لی ہے۔
بنگلہ دیش نے پہلے بیٹنگ کرتے ہوئے مقررہ 20 اوورز میں 6 وکٹ کے نقصان پر 153 رنز بنائے۔ بنگال ٹائیگرز کی جانب سے توحید ہردوئے 58 ، محمد اللہ 31 ،سومیا سرکار 20 ،لٹن داس 14 اور شکیب الحسن 6 رنز کی اننگز کھیلنے میں کامیاب رہے۔
امریکا کی جانب سے اسٹیون ٹیلر نے 2، سوربھ ،علی خان اور جسدیپ سنگھ نے ایک ایک وکٹ حاصل کی۔
امریکا نے 154 رنز کا ہدف 5 وکٹوں کے نقصان پر 3 گیندیں قبل حاصل کرکے تاریخ رقم کردی، امریکا کی جانب سے کورے اینڈریسن 34 رنز بناکر نمایاں رہے جبکہ ہرمیت سنگھ نے 33 اور اسٹیون ٹیلر نے 28 رنز بنائے۔
