مظفر آباد: آزاد کشمیر میں بجلی کے بلوں کی بائیکاٹ مہم جاری ہے جب کہ اس دوران مساجد سے بجلی کے بل نہ بھرنے کے اعلانات بھی کیے جا رہے ہیں۔
نجی ٹی وی کی رپورٹ کے مطابق کوٹلی سمیت پورے آزاد کشمیر میں مختلف ایکشن کمیٹیوں کی جانب سے بجلی کے بلوں کا بائیکاٹ کرنے کی مہم جاری ہے اور اس حوالے سے کوٹلی، تتہ پانی، کھوئی رٹہ، گوئی نکیال اور ناڑ میں بجلی کے بلوں کا بائیکاٹ کرنے کی مہم کے لیے کیمپ قائم کیے گئے ہیں۔
آزاد کشمیر باغ انجمن تاجران پونچھ ڈویژن کہ صدر حافظ طارق ،عثمان کاشر اور دیگر نے عوامی ایکشن کمیٹی کہ پلیٹ فارم سے 15 لاکھ مالیت کہ بجلی کہ بلات نظر آتش کر دئیے، اس کے علاؤہ بہت سے شہرو میں مسجدوں میں اعلانات ہوئے کہ بجلی کے بل کوئی جمع نہ کرے اتنے زیادہ بل اور اتنے زیادہ ٹیکس pic.twitter.com/WIVIJJ7xJF
— Shafaqat Ali (@Shafaqat_143) August 22, 2023
ہجیرہ کے علاقے میں شہریوں نے بجلی کے سیکڑوں بل جلا دیے۔ دوسری جانب کھوئی رٹہ بار نے بجلی کے بلوں پر ظالمانہ ٹیکسز کے خلاف ہڑتال کا اعلان کردیا جب کہ کوٹلی میں وکلا نے احتجاج کرتے ہوئے حکومت کے خلاف شدید نعرے بازی کی ہے۔
دریں اثنا حکومت نے بجلی کے بل جمع کروانے کی تاریخ میں 28 اگست تک توسیع کر دی۔ مختلف ایکشن کمیٹیوں کا کہنا ہے کہ بجلی کے بلوں سے ظالمانہ ٹیکسز کو ختم کرنے تک احتجاج جاری رہے گا۔