لاہور : نگران وزیراعلیٰ پنجاب محسن نقوی کی زیر صدارت کابینہ کا 19 واں اجلاس منعقدہوا،جس میں عیدالاضحیٰ پر لاہور سمیت پنجاب بھر میں صفائی کے بہترین انتظامات پر صوبائی وزراء، کمشنرز، ڈپٹی کمشنرز، سالڈ ویسٹ کمپنیوں کی کارکردگی کو خراج تحسین پیش کیاگیا اور صفائی کے شاندار انتظامات پر متعلقہ حکام کی کارکردگی کو سراہاگیا۔
صوبائی کابینہ نے پنجاب کے بے گھر سرکاری ملازمین کی رہائش کے مسائل کے حل کے لیے نئے جی او آر تعمیرکرنے کی منظوری دی۔وزیراعلیٰ محسن نقوی نے رہائشی کالونی کی تعمیر کے لیے فوری اقدامات کی ہدایت کی ۔
کابینہ نے لاہور رنگ روڈ کے ایس ایل تھری پراجیکٹ اورنیازی چوک سے بابو صابو تک ایلی ویٹڈ پراجیکٹ کو سالانہ ترقیاتی پروگرام میں شامل کرنے کی منظوری دی۔اجلاس میں داتا دربار کے توسیعی منصوبے کی منظوری دی گئی ۔ توسیعی منصوبے کے تحت داتا دربار میں عالمی معیار کے مطابق لنگر خانہ تعمیر کیاجائے گا اورزائرین کے لیے سہولتوں میں اضافہ کیاجائے گا۔
وزیراعلیٰ محسن نقوی نے توسیعی منصوبے کےلیے ایکوائرکی جانے والی اراضی کے مالکان کو مارکیٹ ریٹ پر ادائیگیوں کی ہدایت کی۔کابینہ نے محکمہ لوکل گورنمنٹ اور پنجاب انفارمیشن ٹیکنالوجی بورڈ کے درمیان ”آپ کی بلدیہ، ہیلپ لائن 1198” کے حوالے سے معاہدے پر دستخط کی منظوری دی۔
علاوہ ازیں پبلک پراسیکیوٹرز کی ٹریننگ کے لئے سنٹر فار پروفیشنل ڈویلپمنٹ آف پبلک پراسیکیوٹرز کے لئے پنجاب گورنمنٹ رولز آف بزنس 2011 میں ترمیم کی منظوری دی گئی۔ ضلع بہاولپور کی تحصیل احمد پور شرقیہ میں جاں بحق بچوں کے لواحقین او رمتاثرہ بچوں کیلئے مالی امداد کی منظوری دی گئی۔
اجلاس میں پنجاب کے تمام سرکاری اسپتالوں کے ایم ایس کو مالی خود مختار ی دینے کا فیصلہ کیاگیاجس کے تحت ایم ایس 10ملین روپے تک کے اخراجات خود کر سکیں گے۔پنجاب کابینہ نے فنانشنل پاورز کو ایم ایس تک تفویض کرنے کے فیصلے کی منظوری دی ۔کابینہ اجلاس میںملتان میں نشتر انسٹی ٹیوٹ آف آپتھالمولوجی اینڈ الائیڈ ویژن سائنسز کے قیام اور سرکاری کالجز میں پرنسپلز کی تعیناتی کےلیے نظرثانی شدہ طریقہ کار کی منظوری دی گئی۔
اجلاس میں پنجاب حکومت کے اکائونٹس برائے مالی سال 2022-23 کی آڈٹ رپورٹ کی منظوری دی گئی۔کابینہ نے موٹر وہیکل رجسٹریشن دستاویزات/فائلز کی اسکینگ کے حوالے سے محکمہ ایکسائز اینڈ ٹیکسیشن اور پنجاب انفارمیشن ٹیکنالوجی بورڈ کے درمیان معاہدے کے مسودے کی منظوری دی۔
اجلاس میں اوکاڑہ آرٹس کونسل کا انتظام لاہور آرٹس کونسل سے واپس لے کر پنجاب آرٹس کونسل کے سپرد کرنے کی منظوری دی گئی۔صوبائی وزرائ،مشیران، چیف سیکرٹری، انسپکٹر جنرل پولیس اور متعلقہ حکام نے اجلاس میں شرکت کی۔
