واپڈا کی سستی پن بجلی مہنگی کرنے کے لیے نیپرا میں درخواست، فیصلہ محفوظ

477

اسلام آباد: ملک میں سستی تیار ہونے والی پن بجلی مہنگی کرنے کے لیے واپڈا نے نیپرا میں درخواست جمع کرادی، جس پر نیپرا کی جانب سے سماعت کے بعد فیصلہ محفوظ کرلیا گیا ہے۔

تفصیلات کے مطابق واپڈا نے سستی پن بجلی مہنگی کرنے کے لیے نیپرا میں درخواست دی، جس میں استدعا کی گئی ہے کہ 21 پلانٹس کا اوسط ٹیرف 3 روپے 68 پیسے فی یونٹ سے بڑھا کر 4 روپے 15 پیسے فی یونٹ مقرر کیا جائے۔

نجی ٹی وی کے مطابق چیئرمین نیپرا توصیف ایچ فاروقی کی سربراہی میں واپڈا کی درخواست پر سماعت ہوئی، جس میں مالی سال 2022-23 کے ٹیرف میں اضافے کی درخواست کا جائزہ لیا گیا۔ واپڈا کی جانب سے دی گئی درخواست میں مالی سال 2021-22 کے 21 پلانٹس کا اوسط ٹیرف 3.68 پیسے سے بڑھا کر مالی سال 2022-23 کیلیے 4.15 روپے فی یونٹ کرنے کا مطالبہ کیا ہے۔

دوران سماعت چیئرمین نیپرا نے واپڈا کی جانب سے سستی بجلی کی پیداوار پر کارکردگی کی تعریف کی، تاہم انہوں نے پن بجلی کے پلانٹس کے کم استعمال پر برہمی کا اظہار بھی کیا۔ اتھارٹی نے درخواست پر فیصلہ محفوظ کرتے ہوئے بعد میں جاری کرنے اور اعداد شمار کا جائزہ لینے کے بعد نوٹیفکیشن جاری کرنے کا اعلان کردیا۔