وزیراعلیٰ سندھ کے معاون خصوصی برائے محکمہ بحالی خصوصی افراد سندھ صادق علی میمن نے کہا ہے کہ پاکستان میں سندھ نے قوت سماعت سے محروم افراد کو ڈرائیونگ لائسنس جاری کرنے میں ایک سنگ میل طے کیا ہے اور سندھ ملک کا پہلا صوبہ بن گیا ہے جس نے سماعت سے محروم ڈرائیونگ لائسنس جاری کیا ہے۔وہ بدھ کو پاکستان ایسوسی ایشن آف دی ڈیف کے زیر انتظام سنٹر آف ایکسی لینس فار ڈیف کراچی کا دورہ کررہے تھے ۔ اس موقع پر ایسوسی ایشن کے چیئرمین عرفان ممتاز بھی موجود تھے۔ وزیر اعلیٰ سندھ کے معاون خصوصی صادق علی میمن نے سنٹر کے مختلف حصوں کا بھی دورہ کیا۔ وزیر اعلیٰ سندھ کے معاون خصوصی صادق علی میمن کو سماعت سے محروم افراد کو دی جانے والی پیشہ ورانہ تربیت کے بارے میں بریفنگ دی گئی۔ انہوں نے وہاں سماعت سے محروم افراد کو دی جانے والی سہولیات کو سراہا۔ صادق علی میمن نے مزید کہا کہ حکومت سندھ نے خصوصی افراد کو بااختیار بنانے کے لیے بہت سے اقدامات کیے ہیں اور پیشہ ورانہ تربیت کے ذریعے ہم انہیں معاشرے کا کارآمد رکن بنا سکتے ہیں۔انہوں نے کہا کہ پیپلز پارٹی کے چیئرمین بلاول بھٹو زرداری اور وزیراعلیٰ سندھ سید مراد علی شاہ خصوصی افراد کی بحالی میں ذاتی دلچسپی لے رہے ہیں اور نجی شعبے کے ساتھ مل کر ان کو تعلیم، صحت اور بحالی کی سہولیات میں بہتری لا رہے ہیں۔وزیر اعلیٰ سندھ کے معاون خصوصی برائے محکمہ بحالی خصوصی افراد سندھ صادق علی میمن نے کہا کہ یہ اطمینان کی بات ہے کہ سماعت اور بصارت سے محروم افراد کے لیے سافٹ ویئر ایپلی کیشنز پر کام جاری ہے تاکہ وہ آزادانہ زندگی گزار سکیں۔ انہوں نے کہا کہ خصوصی افراد کو ان کے جائز حقوق اور مواقع فراہم کیے جائیں تاکہ وہ ترقی کر سکیں۔
