ارم فاطمہ
اردو کا پیریڈ شروع ہوچکا تھا۔ مس ثمرہ کلاس روم میں آئیں۔ حاضری کے بعد انہوں نے ایک نظر پوری کلاس کی جانب دیکھا اور کہنے لگیں! دو ہفتے بعد آل صوبائی تقریری مقابلے ہورہے ہیں۔ ہمارا اسکول میزبانی کے فرائض انجام دے گا۔ اس میں صوبے بھر کے بہترین اسکولوں کے بہترین مقرر حصہ لیں گے۔ آپ میں سے جو بچے حصہ لینا چاہتے ہیں، وہ اپنا نام لکھوادیں۔ اور بھرپور تیاری کریں اور بہترین طریقے سے حصہ لیں احمد اور فاطمہ نے اپنے نام مس ثمرہ کو لکھوا دیے۔
ان کی نظریں پوری کلاس سے ہوتی ہوئیں ثانیہ پر آکر رک گئیں جو سر جھکائے اپنی نوٹ بک پہ لکھنے میں مصروف تھی۔ وہ کلاس کی ذہین ترین اسٹوڈنٹ تھی مگر اس نے کبھی کسی مقابلے میں حصہ نہیں لیا تھا۔ مس ثمرہ کئی مرتبہ اسے کہہ چکیں تھیں مگر وہ انہیں ایک ہی جواب دیتی تھی ۔ مس میں ہال میں موجود لوگوں کے سامنے نہیں کھڑی ہوسکتی ان کی نظروں کا سامنا نہیں کر سکتی۔
مس ثمرہ جانتیں تھیں کہ اس میں صلاحیت ہے تقریر کرنے کی مگر بس اس میں اعتماد کی کمی ہے۔ایک خوف ہے کہیں وہ ناکام نہ ہوجائے۔ انہوں نے ثانیہ سے کہا اسکول کے بعد مجھے اسٹاف روم میں ملنا، مجھے تم سے ضروری بات کرنی ہے اسکول ختم ہونے کے بعد جب وہ سٹاف روم میں گئی تو مس ثمرہ وہاں پہلے سے موجود تھیں۔ ثانیہ کو دیکھ کران کے لبوں پہ مسکراہٹ پھیل گئی۔ ثانیہ خاموشی سے ان کی جانب دیکھ رہی تھی۔
وہ ایک لمحے کو مسکرائیں اور کہنے لگیں، میں چاہتی ہوں تم ان مقابلوں میں حصہ ضرور لو۔ تمہیں اپنے اندر اعتماد پیدا کرنا ہوگا کہ تم جیت سکتی ہو۔ مجھے تم پر یقین ہے۔ اگر ایک لمحے کے لیے تم یہ ذہن سے نکال دو کہ تمہیں کوئی دیکھ رہا ہے اور یہ تصور کرو کہ سارا ہال خالی ہے۔ اپنے اوپر بھروسہ کرو تو مجھے اعتماد ہے تم پر، تم یہ مقابلہ جیت سکتی ہو۔ثانیہ نے ان کے لہجے اور الفاظ میں اپنے لیے خلوص اور یقین دیکھا اور پھر اسی ایک لمحے میں اس نے فیصلہ کیا کہ وہ مقابلے میں حصہ لے گی۔ مس ثمرہ اس کے فیصلے سے بہت خوش تھیں۔
تقریری مقابلے کا دن آچکا تھا۔ سب بچے بہت پرجوش تھے۔ پورا ہال مختلف اسکولوں سے آئے بچوں ، ان کے اساتذہ اور والدین سے بھرا ہوا تھا۔ ایک ایک کر کے مقابلے میں حصہ لینے والے بچے آتے گئے اور تقریر کر کے جاتے رہے۔بالاخر تقریر کے لیے شانیم کا نام پکارا گیا۔وہ دھڑکتے دل کے ساتھ ڈائس کی جانب گئی ایک لمحے کے لیے اپنی آنکھیں بند کر کے مس ثمرہ کے الفاظ دہرائے۔
بسم اللہ پڑھ کر اپنی تقریر کا آغاز کیا۔ اللہ کی مدد تھی، مس ثمرہ کے کہے گئے الفاظ کا اثر تھا اور یقین اور اعتماد تھا کہ وہ روانی سے بنا ہچکچاہٹ کے، الفاظ کی بہترین ادائیگی کے ساتھ اپنی تقریر کا اختتام کیا۔ پورے ہال پر سکوت طاری تھا۔ اور پھر پورا ہال تالیوں سے گونج اٹھا۔ واقعی اس کی تقریر بہترین اور پر اثر تھی۔
سبھی ججوں نے اسے ونر قرار دیتے ہوئے پہلے انعام کا حقدار قرار دیا۔ثانیہ کو ایک لمحے کو یقین نہ آیا۔ اسے اپنے آنسوؤں پرقابو پانا مشکل ہوگیا اور وہ روتے ہوئے مس ثمرہ کے گلے لگ گئی۔ مس ثمرہ نے اسے بہت شاباش دی۔ انہیں خوشی تھی کہ ثمرہ نے اپنے خوف پر قابو پالیا تھا اورمقابلے میں پہلی پوزیشن لی۔ یہ مس ثمرہ کے اعتماد کی جیت تھی۔
قرض
عالیہ ذوالقرنین
موبائل کی گھنٹی بجی تو حماد نے تیار ہوتے ہوئے مصروف انداز میں موبائل آن کیا۔
انسپکٹر حماد! کیا حال ہے؟ میں نے سنا ہے کہ تمہارا بیٹا برین ٹیومر کے مرض میں مبتلا ہے اور اس کے علاج کے لیے کم از کم 5لاکھ روپے کی ضرورت ہے جو تمہارے پاس نہیں اس کے بولنے سے پہلے ہی ایک کرخت آواز اس کی سماعت سے ٹکرائی۔
تم کون ہو؟ انسپکٹر حماد نے سختی سے پوچھا۔
یہ چھوڑو کہ میں کون ہوں؟ بس تم ہمارا ایک کام کر دو ہم تمہارا انعام تمہارے اکاؤنٹ میں ٹرانسفر کر دیں گے اور تمہارا بیٹا بچ جائے گا اور دیکھو میری کال کی کھوج میں مت پڑنا یہ نمبر تم ٹریس نہیں کر سکتے وہی آواز پھر سنائی دی ۔
کیا چاہتے ہو تم؟ انسپکٹر حماد نے ڈھیلے سے لہجے میں پوچھا ۔
آج تمہاری ڈیوٹی جلسے میں جس جگہ لگی ہے بس وہاں سے تم نے ایک آدمی کو بغیر چیکنگ کے اندر جانے دینا ہے اور بس… تمہارا کام ختم ۔
کیوں بغیر چیکنگ کے کیوں؟ حماد نے حیرانگی سے پوچھا۔
تمہیں یہ نہ پوچھنے کے ہی پانچ لاکھ دیے جا رہے ہیں ،انسپکٹر حماد کرخت آواز مزید کرخت ہوئی ۔
ٹھیک ہے میں سوچ کر بتاؤں گا ۔۔ حماد کی نگاہوں کے سامنے عمر کا تڑپتا وجود گھوم گیا۔ اس نے بے بسی سے کہا ۔
ویل ڈن! یہ ہوئی نا بات مگر ایک بات بتا دوں کہ سوچنے کا وقت نہیں اگر تمہیں میری آفر منظور ہو تو آج سرخ رنگ کا رومال گردن میں لگا کر جلسے میں پہنچ جانا.. ہمارا آدمی جیسے ہی اندر داخل ہو گا رقم تمہارے اکاؤنٹ میں داخل ہو جائے گی۔ کرخت آواز قہقہے میں بدلی اور کال منقطع ہوگئی۔
انسپکٹر حماد کے ذہن میں طالب علمی کے دور میں پڑھی گئی حدیث مبارکہ گونجنے لگی ’’ تم میں سے ہر شخص نگہبان ہے اور اس سے اس کی رعیت کے بارے میں سوال کیا جائے گا‘‘ مگر اگلے ہی لمحے وہ سب سوچیں جھٹکتے ہوئے باہر نکل گیا۔
آپ کہاں جا رہے ہیں؟ ہمارا عمر بخار اور سر درد سے تڑپ رہا ہے اور آپ کو آج بھی ڈیوٹی پیاری ہے؟ 3دن ہو گئے ہیں آج محلے کے ڈاکٹر سے دوا لیتے ہوئے مگر بجائے ٹھیک ہونے کے اور نڈھال ہو گیا ہے اور ہاں… جو رپورٹ کل آئی ہیں وہ ڈاکٹر کو دکھائی وہ کیا کہتا ہے؟ نصرت نے روتے ہوئے اپنے شوہر حماد سے پوچھا جو پولیس یونیفارم پہن کر جانے کے لیے بالکل تیار تھا۔
جانا تو ہے۔ آج وزیر اعلیٰ صاحب کا جلسہ ہے اور میری ڈیوٹی وہاں لگی ہے۔ میرا وہاں پہنچنا لازمی ہے اور تم جانتی تو ہو کہ پاکستانی پولیس دنیا کی وہ واحد پولیس ہے جو چوبیس چوبیس گھنٹے ڈیوٹی دیتی ہے مگر حاصل نہ وصول۔۔ کسی کو ہمارے مسائل کا خیال ہی نہیں۔ تمام اچھے الفاظ اور مراعات دوسروں کے لیے مختص ہیں۔ یہ ٹھیک ہے کہ باقی ادارے بھی عوام کی حفاظت کرتے ہیں مگر ہم بھی تو کرتے ہیں تو ہمارے ساتھ پتا نہیں یہ غیروں جیسا سلوک کیوں کیا جاتا ہے؟ بہرحال تم عمر کو اسپتال لے جانا رپورٹ ڈاکٹر دیکھ لے گا میں کوشش کروں گا اگر بڑے صاحب نے آنے کی اجازت دے دی تو میں بھی آجاؤں گا۔ حماد نے ایک ٹھنڈی آہ بھر کر بے چارگی سے کہا ۔
مگر… میں اسے کیسے اسپتال لے جاؤں؟ میرے پاس پیسے نہیں ہیں؟ کل پڑوسن سے 2ہزار روپے لیے تھے وہ اس کی دوا اور ٹیسٹ پر خرچ ہو گئے۔ نصرت نے بے آواز روتے ہوئے کہا ۔
تم ایسا کرو اسے سرکاری اسپتال میں لے جاؤ میں نے سنا ہے وہاں ایک روپے کی پرچی پر علاج ہو جاتا ہے کچھ تو علاج کر ہی دیں گے۔ حماد نے بے بسی سے کہا اور تیزی سے باہر نکل گیا ۔
حماد محکمہ پولیس میں انسپکٹر تھا۔ ساری زندگی تنگی کو حرام کھانے پر ترجیح دی۔ مگر جوں جوں تینوں بچے بڑے ہو رہے تھے تنخواہ ناکافی ہونے لگی تھی۔اپنی ڈیوٹی ایمانداری اور خوش اسلوبی سے سر انجام دینے کے باوجود کبھی حوصلہ افزائی کے دو بول بھی نہیں ملے تھے۔وہ عمرکی بیماری کے بارے میں سوچتا جلسہ گاہ پہنچا جسے اس نے اپنی بیوی سے بھی چھپایا تھا ۔مگر اسے امید تھی کہ آج اس کے بیٹے اس کے عمر کا باقاعدہ علاج شروع ہو جائے گا کیونکہ سرخ رومال اس کی گردن میں لگا تھا ۔ اچانک موبائل کی آواز اس کے کانوں سے ٹکرائی۔ تم نے سرخ رومال لگا کر عقلمندی کا ثبوت دیا ہے انسپکٹر! ہمارے آدمی کی نشانی بھی گردن میں لگا یہی سرخ رومال ہے۔
کرخت آواز ایک بار پھر سنائی دی اور بغیر جواب سنے فون بند کر دیا گیا۔ جلسہ گاہ میں لوگ کافی تعداد جمع ہو چکے تھے۔ اچانک اس کی نظر سامنے سے آتے ایک شخص پر پڑی گردن میں سرخ رومال لگائے محتاط انداز میں ادھر ادھر دیکھتے وہ اسی راستے کی طرف آ رہا تھا جہاں سے انسپکٹر حماد نے اسے بغیر چیک کئے گزارنا تھا۔ اس سے پہلے کہ وہ شخص اس راستے سے گزر کر اندر جاتا اچانک انسپکٹر حماد کے دونوں ہاتھوں حرکت میں آئے ایک ہاتھ سے اس نے سرخ رومال اپنی گردن سے کھینچ کر اتارا اور دوسرے ہاتھ سے اس آدمی پر جھپٹا۔ پولیس اس آدمی پر قابو پا کر گھسیٹتی ہوئی پیچھے لے جا چکی تھی یہ سب اتنا اچانک ہوا کہ چند لوگوں کے سوا کسی کو پتا نہ چل سکا کہ کیا ہوا ہے؟ اس نے اسی سرخ رومال سے اپنی پلکوں پر ٹکے بے آواز آنسو صاف کیے اور اگلے شخص کی تلاشی لینے لگا۔
انسپکٹر حماد کی فرض شناسی اور ایمانداری بیٹے کی زندگی پر سبقت لے جا چکی تھی۔ حماد اپنا فرض نبھا چکا تھا مگر ابھی قدرت نے اپنا قرض چکانا تھا اور اگلے دن اخبار فروش بازار میں چیخ چیخ کر اخبار بیچ رہا تھا۔
آج کی تازہ خبر! انسپکٹر حماد کو خود کش حملہ آور پکڑنے پر وزیر اعلیٰ کی طرف سے 5لاکھ روپے انعام کا اعلان ۔
ذہانت آزمائیے
محمد جاوید بروہی
1۔ لفظ آستین اور پیچھے کی اس طرح لکھیئے کہ ایک نقطہ بھی استعمال نہ ہو۔
2۔ کس ملک کا نام ایک سبزی کا نام بھی ہے؟
3۔ حرف ق پہ ختم ہونے والے دو ملکوں کے نام بتائیے؟
4۔ اس کہاوت میں خالی جگہ کون سے جانور کا نام آئیگا۔
نیا نوکر مارے ________ (شیشہ، چیتا، ہرن)
5۔ ان الفاظ کو اردو میں کیا کہتے ہیں۔
ڈینٹٹ، ڈسپنسری، ہیڈماسٹر، مائیکرو اسکوپ
6۔ آسٹریا کا ویانا سے کتنا فاصلہ ہے؟
7۔ بحرین اور قطر کے بیچ میں کیا؟
8۔ ناصر کی ساس ماں اور نذیر کی ساس بیٹی ہے دونوں ماں بیٹی ہیں بتائیے ناصر اور نذیر کا آپس میں کیا رشتہ ہے؟
9۔ وہ کیا ہیں جو قازقستان میں آٹھ تنزانیہ میں سات موزبسیق میں چھ اور روس میں ایک بھی نہیں۔
10۔ ایشیا کے ایک ایسے ملک کا نام بتائیں جس میں نقطہ استعمال نہیں ہوتا؟
11۔ دو ایسے الفاظ بتائیں جن کے آخری حروف ہٹانے سے ملکوں کے نام بن جاتے ہیں؟
12۔ اردو کے ساتھ ایسے الفاظ بتائیے جو ملکوں کے نام بھی ہیں؟
جوابات کے لیے شیشے کا استعمال کیجیے
