میں نے اس سے کل یہ کہا
تم انگلش کے ٹیچر ہو
انگلش خوب پڑھاتے ہو
Keats کی نظم سناتے ہو
Shakespeareبھی پڑھاتے ہو
تم نے کبھی یہ سوچا ہے
دل میں اترتے لہجے میں
تم تشریح جو کرتے ہو
دھیان کتنا میں دیتی ہوں
Keatsکے بارے کہتے ہو
کتنے دلکش لمحوں میں
اس نے نظمیں کیں تخلیق
کیا ہی کمال تھا شاعر
تم جو حوالہ دیتے ہو
Titanic کا، William کا
Long fellow Henryکی اور
کبھی جو قاضی عیسیٰ کی
نظمیں مجھے سناتے ہو
ان سب کا مطلب کیا ہے
ہنس کر وہ یہ کہنے لگا
کیوں ہوتی ہو تم بے زار
کیا میری باتیں تم کو
بور ہمیشہ کرتی ہیں
کبھی تو پڑھ کر دیکھو تم
ان کی سندر نظموں کو
پھر یہ نظمیں قاری پر
ایک جہان معانی کا
جیسے وا کر دیتی ہیں
تم بھی کرو گی پھر محسوس
پیار بھرے لمحوں کو دعا
میں نے جواباً اس سے کہا
سنو ،سنو تم میری بات
پیار کی سندر باتوں میں
قصے اور کہانی میں
دل سارے آجاتے ہیں
گزرے ہوئے لمحے سارے
لوٹ کے پھر نہیں آتے ہیں
پھرمجھ سے وہ کہنے لگا
ایک الگ ہی منظر ہے
ان کی نظموں کے اندر
رنگ برنگی اک دنیا
ہے ان نظموں میں آباد
میں نے کہا اس سے لیکن
ان کی نظموں سے میرا
کیا لینا کیا دینا ہے
میرے لیے تم سب کچھ ہو
ان کے قصے رہنے دو
مت ہی سناؤ تم مجھ کو
تم خود بھی اک شاعر ہو
میرے بارے میں تم نے
کوئی نظم لکھی ہے کیا؟
کہنے لگا یہ سن کروہ
ہاں لکھی تو ہے اک نظم
میں نے تمھارے بارے میں
جس میں تمھاری آنکھوں کا
اک خوش رنگ حوالہ ہے
جس میں تمھارے اور میرے
پیار کی مدھر کہانی ہے
میں نے کہا میرے شاعر
تم بس اتنا بتلاو
لمحے تم سے کیا کہتے،
کیا کیا باتیں کرتے ہیں
ہنس کروہ یہ کہنے لگا
میں باتوں کے دھاگوں سے
لمحے مقید کرتا ہوں
دامنِ دل بھر لیتا ہوں
تم سے محبت کرنا توانہی کو پڑھ کر سیکھا ہے
تیرے کومل ہاتھوں کو
دھیرے سے چھو لیتا ہوں
تیرے لمس کی کوملتا
سوئے خواب جگاتی ہے
بے خود ہو کر میں تجھ کو
بانہوں میں بھر لیتا ہوں
پیار تجھے کر لیتا ہوں
