ہم بھی مثل دریا ہیں

دریائے کنھار میں رافٹنگ کرتے ہوئے آگے ایک بڑی چٹان نظر آئ۔پانی کا شور جو اس چٹان سے ٹکرانے کی وجہ سے پیدا ہو رہا تھا وہ ہمارے دلوں میں عجیب دہشت پیدا کر رہا تھا۔شوق میں بیٹھ تو گئے تھے لیکن بہرحال گھبراہٹ بھی تھی۔اس بوٹ میں بلکل کنارے پر بٹھایا جاتا ہے مجھے بچیوں کے لیے زیادہ پریشانی تھی لیکن اس مقام سے ہم بہت آرام سے نکل آئے کیونکہ ہمارے رہبر نے ہمیں پہلے ہی رافٹنگ کے لیے ضروری ہدایات دے دی تھی چپو کو آگے کی طرف اور پیچھے کی طرف کب اور کیسے چلانا ہے اور کب روکنا ہے یہ اس نے سکھا دیا تھا ۔اس چٹان کے آنے سے پہلے ہی اس نے کہہ دیا تھا کہ دیکھیں کشتی کا توازن خراب ہوگا بہت سا پانی اندر آئے گا بس  آپ کو گھبرانا نہیں ہے توازن خراب نہیں کرنا ہے،چیخنا نہیں ہے اور میری ہدایت پر توجہ مرکوز رکھنی ہے۔ہماری ایک بہن بیچ میں تھیں اور ان کے پاس چپو چلانے کی ذمہ داری نہ تھی وہ ان ملنے والی ہدایات کو اور زیادہ بلند آواز میں سب تک پہنچاتی تھیں ۔ان سب پر عمل کرتے ہوئے ہم آسانی سے اس مشکل جگہ سے نکل آئے جس سے ہم بہت ڈرے ہوئے تھے۔

بلکل ایسے ہی۔۔۔۔۔ ہماری زندگیوں میں کچھ مسائل ان چٹانوں کی صورت موجود ہوتے ہیں ،یہ شخصیات کے رویے بھی ہو سکتے ہیں صحت کے مسائل بھی ، وسائل کی کمی،دفتر کے ایشوز،گھریلو سیاست ،مقصد کے حصول میں دشواری  یا کچھ بھی ۔۔۔

سمجھنے کی بات یہ ہے کہ ان سے نمٹا جا سکتا ہے۔۔۔۔نمٹنے کی تکنیک سیکھ کر ۔۔ان سے ٹکرا ٹکرا کر اپنے آپ کو ختم کرنا عقلمندی نہیں ۔۔۔بلکہ ان کہ ہوتے ہوئے اپنی منزل پر نظر کو مرکوز رکھتے ہوئے ،اپنی صلاحیتوں کو بروئے کار لاتے ہوئے ،اللہ پر یقین کرتے ہوئے آگے بڑھنا یہی زندگی کا وہ سبق ہے جو یہ دریا ہمیں دے رہا ہوتا ہے۔

ہمیں رکنا نہیں آتا

کہ دریا راستہ اپنا ہمیشہ خود بناتا ہے،

چٹانیں لاکھ بھاری ہوں

وہ ان کو کاٹ دیتا ہے

وہ ان کو چیر دیتا ہے

ہمیں رکنا نہیں آتا

کہ ہم بھی مثل دریا ہیں۔