کینال بنانے کیخلاف ہر فورم پر آواز اُٹھا رہے ہیں، پی پی رہنما

72

ٹنڈوآدم (نمائندہ جسارت) پیپلز پارٹی کے رہنما سابق سینیٹر ملک امام الدین شوقین نے کہا ہے کہ پیپلز پارٹی دریائے سندھ سے مجوزہ 6 کینالوں بنانے کے خلاف ہے اور ہم ہر فورم پر آواز اُٹھا رہے ہیں۔ ان خیالات کا اظہار انہوں نے پاپولر میچ فیکٹری میں پریس کلب کے وفد سے ملاقات میں کیا۔ انہوں نے کہا کہ یہ بات سراسر جھوٹ ہے کہ صدر آصف علی زرداری نے کینالوں کی منظوری دی ہے، اگر ایسا ہوتا تو پارٹی چیئرمین بلاول بھٹو زرداری سمیت پوری پیپلز پارٹی کینالوں کی مخالفت کرنے کو تیار نہ ہوتی، انہوں نے مجھے سینیٹر اور آئل اینڈ گیس کمیٹی کے چیئرمین کی حیثیت سے نظر انداز نہیں کیا، پیپلز پارٹی بڑی جماعت ہے اور دوسروں کو بھی ذمہ داریاں دی جائیں۔ ٹنڈو آدم میں بلدیہ کی سرکاری جائیدادوں کی نیلامی سے متعلق سوال کے جواب میں انہوں نے کہا کہ غلام مرتضیٰ جونیجو پیپلز پارٹی کے متفقہ چیئرمین ہیں، اگر انہوں نے کچھ غلط کیا ہے تو اس پر ہم پارٹی فورم پر بات کریں گے، میونسپل کی جائیدادوں کی فروخت پر غلط تاثر پیدا ہوا ہے، ایسا نہیں ہونا چاہیے تھا۔ چیئرمین کہتاہے کہ میونسپل کی آمدنی بڑھانے کے لیے اقدامات کیے ہیں۔