کراچی (کامرس رپورٹر) پانی اور توانائی کی تین روزہ پاک واٹر اینڈ انرجی نمائش ایکسپو سینٹر کراچی میں کامیابی سے اختتام پذیر ہو گئی۔ کراچی واٹر اینڈ سیوریج کارپوریشن نے بھی خصوصی اسٹال لگایا۔ نمائش کے آخری روز بھی انڈسٹری کے مختلف شعبوں سے تعلق رکھنے والے کاروباری افراد نے بڑی تعداد میں اسٹالز کا دورہ کیا۔ شرکا نے پانی اور توانائی سے متعلق جدید ٹیکنالوجی، مشینری اور آلات میں دلچسپی ظاہر کی۔ یہ نمائش پرائم ایونٹ منیجمنٹ کی جانب سے منعقد کی گئی تھی۔ ڈائریکٹر پرائم ایونٹ کامران عباسی نے بتایا کہ نمائش کے تینوں دن انڈسٹری کا رجحان حوصلہ افزا رہا۔ انہوں نے بتایا کہ نمائش میں چین، ترکی، مراکو، آسٹریلیا، مصر، امریکہ کی کمپنیاں شریک رہیں۔ دو ہالز میں 60 سے زائد نمائش کنندگان نے 150 اسٹالز لگائے ہیں۔ کراچی واٹر اینڈ سیوریج کارپوریشن نے بھی نمائش میں خصوصی اسٹال لگایا اور بڑی اسکرین کے ذریعے عوامی آگاہی کی ویڈیوز چلائیں۔ اس دوران واٹر کارپوریشن کا عملہ شہریوں کو آگاہی دینے کے لیے بھی ہمہ وقت موجود رہا۔ نمائش کے آخری روز شرکا کو شیلڈز بھی پیش کی گئیں۔ کامران عباسی نے بتایا کہ اب پاک واٹر اینڈ انرجی ایکسپو اگلے ماہ 20 سے 22 جنوری تک لاہور ایکسپو سینٹر میں منعقد ہو گی۔
