پی ٹی آئی ارکان اسمبلی چیف جسٹس سے ملنے سپریم کورٹ پہنچ گئے، اجازت نہیں ملی

523

اسلام آباد: تحریک انصاف کے ارکان قومی اسمبلی چیف جسٹس آف پاکستان سے ملنے کے لیے سپریم کورٹ پہنچ گئے، تاہم وہاں انہیں ملاقات کی اجازت نہیں مل سکی۔

نجی ٹی وی کے مطابق تحریک انصاف کے قومی اسمبلی کے ارکان سپریم کورٹ پہنچے جہاں انہوں نے چیف جسٹس عمر عطا بندیال سے ملاقات کی اجازت مانگی، تاہم انہیں ملاقات کی اجازت نہیں دی گئی۔ رپورٹ کے مطابق اس سلسلے میں ذرائع نے بتایا کہ تحریک انصاف کے ارکان قومی اسمبلی سے رجسٹرار سپریم کورٹ نے بھی ملاقات کرنے سے انکار کردیا۔

واضح رہے کہ چیف جسٹس آف پاکستان سے ملاقات کے لیے آنے والے ارکان قومی اسمبلی کی تعداد 8 تھی، جن میں غلام لالی، عامر سلطان، عامر ڈوگر، خواجہ شیراز، ذوالفقار علی خان، لعل چند، راشد محمود اور صاحب حسن شامل تھے جو پی ٹی آئی کے استعفوں کی منظوری سے متعلق چیف جسٹس سے ملنا چاہتے تھے۔

پی ٹی آئی رہنما عامر ڈوگر نے غیر رسمی گفتگو کرتے ہوئے کہا کہ سپریم کورٹ نے اسمبلی واپس جانے کا کہا تو حکومت نے استعفے منظور کرلیے۔