ملک بھر میں پیر کے روز صبح سے بجلی کا بڑا بریک ڈائون ہوگیا اس کے اسباب کا علم ہونے سے قبل حکومت مخالف سیاسی جماعتوں خصوصاً پی ٹی آئی کے رہنمائوں نے اسے امپورٹڈ حکومت کی نالائقی پر محمول کردیا یہ اور بات ہے کہ خرابی وہی نکلی جو عموماً ایسے مواقع پر نکلتی ہے یعنی وولٹیج میں کمی یا ایک گرڈ پر زیادہ دبائو کے نتیجے میں اچانک اس کے بند ہونے سے دوسرے گرڈ پر دبائو بڑھ جانا اس مرتبہ بھی ایسا ہی ہوا ہے تفصیلی تحقیقات کے بعد ہی پتا چلے گا کہ ایسا کیوں ہوا اور اب تک پاکستان میں گرڈ پر دبائو کیوں بڑھتا رہتا ہے۔ پاکستان میں بجلی کی جو ضرورت ہے اس کے پاس اس سے کہیں زیادہ بجلی پیدا کرنے کی صلاحیت موجود ہے۔ لیکن پاکستان ان بجلی گھروں کو چلانے کی صلاحیت نہیں رکھتا کیونکہ وہ جس ایندھن سے چلتے ہیں وہ پاکستان کے پاس وافر نہیں ہے حالانکہ ایک مرتبہ بڑی سرمایہ کاری کرکے یہ کام کیا جاسکتا تھا لیکن مسئلہ یہی ہے کہ ہمارے حکمرانوں کو ترجیح ہی نہیں کہ مستقبل کی کوئی منصوبہ بندی کرلیں۔ سب کی منصوبہ بندی اقتدار حاصل کرنا اور اسے بچانا یا دوسرے کو نکالنے کی ہوتی ہے۔ اس سے قبل 2021 میں دس جنوری کو رات پونے بارہ بجے ایسا ہی بریک ڈائون ہوا تھا۔ ایک گرڈ اسٹیشن پر دبائو بڑھا وہ بند ہووا تو ایک ایک کرکے سارے ٹرپ ہوتے چلے گئے۔ اس سے تین برس قبل 2018 میں بھی ایسا ہی بریک ڈائون ہوا اور 2015 میں بھی ایسا ہی ہوا تھا اور اب 2021 کے دو سال بعد ہی یہ بریک ڈائون ہوگیا ہے۔ پاکستان کی توانائی کی ضروریات کو پورا کرنے کے لیے چین نے ون بیلٹ روڈ کے 60 ارب ڈالر کے منصوبے میں بجلی گھروں کو چلانے اور پیداوار میں اضافے کا پلان بنایا ہے لیکن اب تک پاکستان میں یہ نظام بروئے کار نہ لایا جاسکا۔ سیاسی رہنمائوں خصوصاً ان رہنمائوں سے درخواست ہے کہ وہ کسی بھی حادثے کو حکومت کی ذمے داری قرار دینے سے قبل سوچ لیا کریں کہ ان کے اپنے دور میں بھی ایسا ہوتا رہا ہے۔ ضرورت اس امر کی ہے کہ قومی معاملات پر مشترکہ ذمہ داری اور رویے کا مظاہرہ کیا جائے۔ محض الزام تراشیاں مسائل کا حل نہیں، سب مل کر عوام کو عذاب سے نجات دلائیں۔
