الخدمت کے تحت معذور افراد کو ویل چیئرز اور سفید چھڑیاں فراہم

310

لاہور: الخدمت فاؤنڈیشن کے تحت معذوروں کے عالمی دن کی مناسبت سے ملک بھر میں منعقدہ تقریبات میں  معذور افراد کو ویل چیئرز اور سفید چھڑیاں فراہم کی گئیں۔ تقریبات کا مقصدخصوصی افراد کو درپیش مسائل کے حوالے سے آگاہی اور ان کے حل کے لئے اجتماعی کوششوں کا شعور اجاگر کرنا تھا۔

لاہور میں منعقدہ تقریب میں 50 معذور افراد کو ویل چیئرز اور 50 نابینا افراد کو سفید چھڑی اور ڈیڑھ سو سے زائد تحائف تقسیم کئے،خصوصی افراد کے لیے متحرک تنظیموں نے اسٹالز بھی لگائے۔

تقریب سے خطاب کرتے ہوئے الخدمت فاؤنڈیشن پاکستان کے نائب صدر ڈاکٹر مشتاق مانگٹ نے کہا کہ عالمی ادارہ صحت کی ایک رپورٹ کے مطابق اس وقت دنیا بھر میں 1 ارب افراد معذور ہیں جو کہ دنیا کی کل آبادی کا 15 فیصد بنتا ہے۔ اس میں 7 کروڑ 50 لاکھ افراد کو ویل چیئرکی سہولت میسر نہیں ہے۔

اقوام متحدہ کے ڈویلپمنٹ پروگرام کے مطابق اس وقت پاکستان میں کم و بیش 2 کروڑ 70 لاکھ افرادکسی نا کسی صورت میں معذوری کا شکارہیں۔ پاکستان بیورو آف اسٹیٹسٹکس کے مطابق 2 لاکھ 95 ہزارافراد جسمانی معذور ہیں، جن میں سے اکثریت پسماندہ علاقوں سے تعلق رکھتی ہے اور بنیادی علاج معالجے اور ویل چیئر ز جیسی سہولیات سے محروم ہے۔

الخدمت فاؤنڈیشن پاکستان کے میڈیا ریلیشنز کے سینئر منیجر شعیب ہاشمی نے بتایا کہ الخدمت فاؤنڈیشن کو خصوصی افراد کی فلاح و بہبود کے اس کام میں امریکی فلاحی تنظیم ‘فری ویل چیئر مشن’ کا تعاون حاصل ہے۔ فری ویل چیئر مشن ترقی پذیر ممالک میں معذور افراد کے لیے مفت ویل چیئرز مہیا کرتی ہے۔

تقریب میں شریک خصوصی فرد محمد شوکت جو کہ انٹرنیشنل ویل چیئر کرکٹ پلیئر بھی ہیں بتایا کہ مجھے ویل چیئر کی سخت ضرورت تھی لیکن اتنے وسائل نہ تھے کہ اپنے لئے ایک اچھی ویل چیئر خرید سکوں۔ تقریب میں شریک خاتون نے وہیل چئیر ملنے پر اطمینان کا اظہارکیا۔