جنوبی وزیرستان میں سیکورٹی فورسز اور دہشت گردوں کے درمیان فائرنگ، حوالدار شہید

149

راولپنڈی: جنوبی وزیرستان کے علاقے سراروغہ میں سیکورٹی فورسز اور دہشت گردوں کے درمیان جھڑپ، فائرنگ کے شدید تبادلے میں حوالدار عمر حیات بہادری سے لڑتے ہوئے شہید ہو گئے۔

پاک فوج کے شعبہ تعلقات عامہ (آئی ایس پی آر) کے مطابق جنوبی وزیرستان کے علاقے سراروغہ میں سیکورٹی فورسز اور دہشت گردوں کے درمیان جھڑپ ہوئی، جس کے دوران فائرنگ کا شدید تبادلہ ہوا۔

سیکورٹی فورسز نے موثر انداز میں دہشت گردوں کو جواب دیا، شدید فائرنگ کے تبادلے کے دوران کوہاٹ کے 39 سالہ حوالدار عمر حیات بہادری سے لڑتے ہوئے شہید ہوگئے۔  علاقے میں ممکنہ دہشت گردوں کے خاتمے کے لیے سرچ آپریشن بھی کیا گیا۔

ترجمان کے مطابق پاک فوج دہشت گردی کی لعنت کے خاتمے کے لیے پرعزم ہے اور ہمارے بہادر جوانوں کی قربانیاں ہمارے عزم کو مزید مضبوط کرتی ہیں۔