پشاور: خیبرپختونخوا حکومت کے معاون خصوصی برائے اطلاعات بیرسٹر سیف نے کہا ہے کہ علی امین گنڈا پور آڈیو میں لائسنس یافتہ اسلحے کی بات کررہے ہیں اور قانونی اسلحہ رکھنے میں کوئی قباحت نہیں ہے۔
وزیر داخلہ رانا ثنا اللہ کی پریس کانفرنس پر ردعمل دیتے ہوئے بیرسٹر سیف کا کہنا تھا کہ رانا ثنا اللہ اپنی 27 کلومیٹر سلطنت بچانے کے لئے ہے درپے پریس کانفرنسسز کررہے ہیں، علی امین گنڈاپور آڈیو میں لائسنس یافتہ اسلحے کی بات کررہا ہے اور اپنی حفاظت کے لئے لائسنس والا اسلحہ ساتھ رکھنے میں کوئی قباحت نہیں ہے۔
بیرسٹر سیف کا کہنا تھا کہ رانا ثنا اللہ خود غنڈہ گردی اور تشدد کی بات کررہے ہیں اور دوسری طرف لائسنس یافتہ اسلحے پر اعتراضات اٹھارہے ہیں، اگر لائنسس یافتہ گارڈ حفاظت پر مامور ہوں تو اس میں برائی کیا ہے۔انہوں نے کہا کہ اتنا بے چارا وزیر داخلہ میں نے کبھی زندگی میں نہیں دیکھا ہے، جو پریس کانفرنسسز کے ذریعے گرفتاریوں کی التجائیں کررہا ہو۔
معاون خصوصی برائے اطلاعات نے کہا کہ علی امین گنڈاپور پاکستان تحریک انصاف کا اثاثہ ہے، ان کی گرفتاری کی فکر کرنے کی بجائے رانا ثنا اللہ اپنی فکر کریں کیونکہ وہ جلد ہمارے شکنجے میں آنے والے ہیں، امپورٹڈ حکومت چاروں اطراف سے تحریک انصاف کے کارکنوں کے گھیرے میں ہیں اب ہم انہیں بھاگنے نہیں دیں گے، رانا ثنا اللہ عقل سے کام لیکر بھاگنے کا بندوبست کریں۔۔
